Podujevë: Komiteti për Komunitete diskutoj për fillimin e vitit shkollor dhe përfshirjen e nxënësve të komuniteteve joshumicë

Komiteti për Komunitete ka mbajtur mbledhjen e radhës, ku temë kryesore ishte fillimi i vitit të ri shkollor dhe përfshirja e nxënësve të komuniteteve joshumicë në procesin mësimor.

Kryesuesi i mbledhjes, Xhafer Ademi, tha se sipas informatave që kanë, të gjithë nxënësit e komuniteteve joshumicë që kanë arritur moshën janë regjistruar në klasën e parë. Ndërsa, në shkollat e mesme shumica e nxënësve janë regjistruar, por ka edhe raste kur nuk kanë vazhduar shkollimin, pasi arsimi i mesëm nuk është i detyrueshëm.Për një raport më të saktë mbi gjendjen, Minire Zhitia nga Drejtoria për Arsim, tha se është e nevojshme më shumë kohë, pasi ende janë duke u mbledhur të dhëna nga terreni.

Në mbledhje u ngrit edhe çështja e sigurimit të librave shkollorë për nxënësit e komuniteteve joshumicë, por edhe për ata të komunitetit shqiptar që kanë vështirësi ekonomike. Ademi kërkoi nga Komuna që, sikurse në vitet e kaluara, të ndihmojë me mbulimin e shpenzimeve për libra.

Në këtë drejtim, Liman Zeqiri, udhëheqës i Zyrës për Komunitete dhe Kthim, tha se do të konsultohet me zyrtarët kompetentë të Komunës për të parë mundësinë e krijimit të një fondi të veçantë për këtë çështje.

Sa i përket vizitave në shkollat e Sfeçël, Orllan dhe Batllavë, u vendos që ato të realizohen në një periudhë të mëvonshme, për shkak se është fillimi i vitit shkollor.