Aleanca e re në Podujevë: Ajet Potera shfaqet përkrah Ekrem Hysenit, mesazh i fortë politik kundër VV-së?

Një zhvillim i papritur politik ka ndodhur në Podujevë, pikërisht në ditën kur kryeministri Albin Kurti vizitoi qytetin për të promovuar listën kandiduese të Lëvizjes Vetëvendosje me kryetarin aktual Shpejtim Bulliqi.

Deputeti i LDK-së, Ekrem Hyseni, publikoi një fotografi me ish-komandantin e UÇK-së dhe ish-kandidatin e VV-së për kryetar të Podujevës, Ajet Poterën, duke dhënë një mesazh të qartë politik.

“Bashkë me Ajet Poterën, për një qeverisje të pastër e me dinjitet, siç e meriton Podujeva dhe qytetarët e saj! Ky është vullneti i qytetarëve e veprimtarëve të Podujevës! Për Podujevën për të gjithë!” – ka shkruar Hyseni në profilin e tij.

Ky veprim shihet si një goditje e rëndë për VV-në në Podujevë, duke pasur parasysh se Ajet Potera ka qenë një nga figurat kyçe të saj në nivel qendror, si dhe ish-drejtor i Inspeksionit në Komunën e Podujevës.

Analistët lokalë vlerësojnë se afrimi i Poterës me Hysenin mund të ndryshojë balancat politike në këtë komunë, e njohur për rivalitetin e fortë mes LDK-së dhe VV-së.

Ndërkohë, nga VV ende nuk ka pasur ndonjë reagim lidhur me këtë zhvillim.