I riu në Podujevë feston fejesën me armë – policia ia sekuestron kallashin dhe e ndalon për 48 orë

Një 25-vjeçar ka përfunduar në ndalim policor pasi është kapur duke mbajtur dhe përdorur armë zjarri në Podujevë.

Burime të Sinjalit bëjnë me dije se rasti ka ndodhur më 17 gusht 2025, rreth orës 22:50, në rrugën “Mursel Dabinovci”.

Një zyrtar policor, që ndodhej jashtë detyrës, ka vërejtur një person që mbante në dorë një armë të gjatë AK-47 me një karikator pa fishekë.

Pas urdhrave verbal të dhëna nga polici, i dyshuari është ndaluar dhe arma i është sekuestruar.

Në vendngjarje kanë dalë njësitë policore, të cilat kanë shoqëruar të dyshuarin dhe armën në stacion.

Me pëlqimin e familjarëve, është kontrolluar edhe shtëpia e tij, ku në oborr janë gjetur tre gëzhoja, që janë sekuestruar si prova materiale. Gjatë intervistimit në prani të avokatit mbrojtës, i dyshuari ka pranuar se kishte shtënë në ajër me armë për shkak se ishte fejuar.

Me urdhër të Prokurorit Kujdestar, rasti është iniciuar për veprat penale “Mbajtja në pronësi, kontroll ose posedim i paautorizuar i armës” dhe “Përdorimi i armës apo mjetit të rrezikshëm”.

25-vjeçari është ndaluar për 48 orë, ndërsa hetimet janë duke vazhduar.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.