Vetëvendosje publikon listën e kandidatëve për Asamblenë Komunale në Podujevë

Lëvizja Vetëvendosje në Podujevë ka dorëzuar sot zyrtarisht listën e kandidatëve për Asamblenë Komunale, me të cilën synon të garojë në zgjedhjet lokale të tetorit.

Kryetari aktual i Komunës, Shpejtim Bulliqi, ka bërë të ditur se kjo është një “listë e fitores së përbashkët”, duke e cilësuar gjithëpërfshirëse dhe përfaqësuese të qytetarëve të Podujevës.

“Në të janë të bashkuar profesionistë të fushave të ndryshme, gra e burra që mbrojnë dhe përfaqësojnë interesin publik, si dhe të rinj e të reja me energji e ide vizionare,” – ka shkruar Bulliqi.

Sipas tij, me këtë listë Vetëvendosje synon të vazhdojë punën e nisur, të përfundojë projektet në proces dhe të realizojë vizionin për një Podujevë më të zhvilluar, më të drejtë dhe më të barabartë për të gjithë qytetarët.

Dorëzimi i listës shënon një nga hapat kryesorë të fushatës zgjedhore, ndërsa garat për asamble pritet të jenë të forta mes subjekteve politike në komunë.