Memli Krasniqi: Isak Shabani është oferta jonë për Podujevën

Kryetari i Partisë Demokratike të Kosovës (PDK), Memli Krasniqi, ka shpallur mbështetjen për Isak Shabanin si kandidat për kryetar të Komunës së Podujevës, duke e quajtur atë “ofertën që i duhet Podujevës”.

Sipas Krasniqit, Podujeva ka nevojë për një udhëheqje që e njeh qytetin në çdo cep, i njeh njerëzit dhe hallet e tyre, di të bashkojë, të planifikojë dhe të punojë me vizion afatgjatë.

“Isak Shabani është njeriu që i plotëson këto nevoja. Me përvojë si ish-deputet, tre mandate asamblist dhe zyrtar i lartë në administratën shtetërore, ai ka njohuri të thella për funksionimin e institucioneve dhe menaxhimin e komunës,” ka theksuar ai.

Krasniqi ka kujtuar edhe angazhimin atdhetar të Shabanit, duke përmendur kontributin e tij si bashkëluftëtar i komandantit Zahir Pajaziti.

“Jam i bindur se me Isakun në krye, Podujeva do të ketë udhëheqjen e përgjegjshme, të ndershme dhe të përkushtuar që e meriton,” ka deklaruar kryetari i PDK-së.