PDK zyrtarizon kandidatët për kryetarë komunash – Isak Shabani garon për Podujevën

Partia Demokratike e Kosovës (PDK) ka zyrtarizuar kandidatët e saj për kryetarë të komunave në zgjedhjet e ardhshme lokale, ndërsa për Komunën e Podujevës kandidati i kësaj partie do të jetë Isak Shabani.

Lajmi është konfirmuar edhe nga vetë Shabani, i cili përmes një statusi publik ka njoftuar vendimin e tij për të hyrë në garë, pas kërkesave të shumta nga qytetarët, strukturat e partisë dhe aktivistët.

“Pas shumë kërkesave, mbështetjes së sinqertë nga qytetarët, strukturat e partisë dhe aktivistët, kam marrë një vendim me shumë përgjegjësi: ta pranoj kandidaturën për Kryetar të Komunës sonë”, ka shkruar Shabani.

Ai shtoi se kandidatura nuk buron nga ambicie personale, por nga dëshira për t’i shërbyer qytetarëve me ndershmëri dhe përkushtim. Shabani falënderoi Kryesinë e PDK-së dhe kryetarin Memli Krasniqi për besimin dhe përkrahjen.

“Tani është koha të bëhemi bashkë. Koha për ta kthyer besimin në vepra, për ta rikthyer shpresën në institucione, dhe për ta ndërtuar një Podujevë më të drejtë, më të zhvilluar dhe më të denjë për të gjithë”, thuhet në mesazhin e tij drejtuar qytetarëve.

Kush është Isak Shabani?

Isak Shabani është një emër i njohur në politikën dhe shoqërinë kosovare. I lindur në fshatin Orllan të Podujevës në vitin 1964, ai ka qenë bashkëluftëtar i dëshmorit Zahir Pajaziti dhe një pjesëtar aktiv i lëvizjes për çlirim. Në vitin 1997 u arrestua nga pushteti serb dhe u dënua me 10 vjet burg për arsye politike, duke kaluar mbi katër vite në burgjet serbe.

Pas luftës, Shabani u angazhua fuqishëm në zhvillimin e institucioneve, sidomos në fushën e shëndetësisë, ku ka ushtruar detyra të rëndësishme si shef i Divizionit për Licencim dhe Akreditim të Institucioneve Shëndetësore dhe më pas si zëvendësdrejtor i Departamentit për Zhvillim Strategjik Shëndetësor.

Shabani ka qenë deputet në Kuvendin e Kosovës dhe tani është kryetar i degës së PDK-së në Podujevë, Ai shquhet për përkushtim të vazhdueshëm në mbrojtje të interesave të qytetarëve të kësaj komune.

Shabani hyn në garën për të udhëhequr Podujevën me një profil të pasur në shërbim publik dhe me një histori të dëshmuar përkushtimi ndaj vendit.

PodujevaPRESS.net do të përcjellë nga afër zhvillimet rreth kësaj gare zgjedhore dhe programet e kandidatëve për të informuar drejt qytetarët.