Policët – Heronj të heshtur në Livadicë të Podujevës: Shpëtojnë familje dhe shtëpi nga flakët e zjarrit

Në një akt guximi të jashtëzakonshëm, në pasditen e 7 korrikut 2025 katër pjesëtarë të Policisë së Kosovës, të cilët po shërbenin në pikën kufitare të Merdarës, vrapuan për të shpëtuar jetë njerëzish dhe shtëpi nga një zjarr i fuqishëm që kërcënoi lagjen në Livadicë të Podujevës.

Kur panë nga larg flakët që po i afroheshin rrezikshëm zonës së banuar, pa hezitim me lejen e eprorëve lëshuan vendin e shërbimit dhe u drejtuan me shpejtësi në vendin e ngjarjes. Aty gjetën vetëm gra dhe fëmijë brenda shtëpive, të cilët i evakuuan me urgjencë përpara se flakët të mbërrinin në pragun e tyre.

“Nuk kemi nevojë për emra as foto, ne jemi në shërbim të qytetarëve – është detyra jonë,” u shprehën me modesti policët, të cilët preferuan të mbesin anonimë. Ata treguan se në mungesë të pajisjeve dhe përpara se të mbërrinte njësia e zjarrfikësve, kishin filluar me mjete rrethanore të ndalonin përhapjen e flakëve përreth shtëpive.

“Tymi na kishte humbur pamjen, ishim afër ngulfatjes, por nuk u dorëzuam. Zoti deshi të shpëtonim,” thanë ata. Falë ndërhyrjes së tyre të shpejtë dhe të guximshme, asnjë shtëpi nuk u dogj dhe të gjitha familjet u evakuuan në kohë.

Zjarrfikësit arritën pak minuta më vonë dhe arritën të shuajnë përfundimisht zjarrin, por pa dyshim, aksioni i parë i këtyre katër policëve i dha kësaj ngjarjeje një fund të lumtur.

Ky është një prej atyre rasteve që na kujton se heronjtë shpesh nuk veshin kostume janë ata që pa bujë e pa lavdi vrapojnë drejt rrezikut, vetëm për të mbrojtur jetën e dikujt tjetër.