Komiteti për Komunitete në Podujevë diskuton çështje kyçe për komunitetet jo shumicë – investime të reja dhe vizita në terren në fokus
Komiteti për Komunitete i Kuvendit Komunal të Podujevës ka mbajtur mbledhjen e radhës nën drejtimin e kryesuesit Xhafer Ademi, ku u trajtuan tema me rëndësi për komunitetet jo shumicë në këtë komunë.
Në fillim të takimit u miratua procesverbali i mbledhjes së mëparshme, të mbajtur më 5 mars 2025, ndërsa vëmendje e veçantë iu kushtua planifikimit të vizitave në lagjet ku jetojnë komunitetet jo shumicë, konkretisht në rrugët “Ali Ajeti” dhe “Xhemajl Mustafa”. Edhe pse këto vizita ende nuk janë realizuar, anëtarët e Komitetit u dakorduan që ato të zhvillohen brenda këtij muaji, në bashkëpunim me Zyrën për Komunitete dhe Kthim, për të parë nga afër kushtet e banimit dhe për të evidentuar sfidat aktuale.
Kryesuesi Ademi theksoi problemin e vazhdueshëm të mungesës së ujit të pijshëm në rrugën “Ali Ajeti”. Lidhur me këtë çështje, asamblisti Florent Hasani bëri të ditur se Qeveria e Kosovës ka ndarë 95 mijë euro për shtrirjen e rrjetit të ujësjellësit në këtë zonë, projekt i cili do të zbatohet nga KRU “Prishtina” dhe pritet të nisë së shpejti.
Gjatë mbledhjes, Shefi i Zyrës për Komunitete dhe Kthim, Liman Zeqiri, prezantoi rezultatet e bashkëpunimit afatgjatë me Organizatën Ndërkombëtare për Migrim (IOM). Ky bashkëpunim ka përmirësuar dukshëm infrastrukturën arsimore për komunitetet jo shumicë, duke përfshirë pajisjen e shkollave me kabinete moderne, si dhe ofrimin e mbështetjes për zhvillim ekonomik përmes projekteve për stabilizim ekonomik.
Në fund të mbledhjes, u diskutuan edhe çështje të tjera që prekin drejtpërdrejt jetën e komuniteteve, përfshirë infrastrukturën e lagjeve, kushtet e banimit dhe vaksinimin e fëmijëve kundër gripave sezonale.
