Kuvendi Komunal në Podujevë miratoi Propozim-vendimin për subvencionimin e shpenzimeve për shërbimet e varrimit
Kuvendi i Komunës së Podujevës ka mbajtur mbledhjen e rregullt, të cilën e udhëhoqi Kryesuesi, Hilmi Hoxha, e ku e pranishme ishte Nënkryetarja e Komunës, Marigona Lahu, drejtorët e drejtorive, përfaqësues të KFOR-it, përfaqësues të OSBE-së dhe media.
Para se të fillojnë punimet për pikat e rendit të ditës, anëtarët e Asamblesë nga Lidhja Demokratike e Kosovës, Arjeta Salihu dhe Qëndrim Softolli dhanë dorëheqje nga pozitat e anëtarëve të Kuvendit, duke theksuar arsyet se tashmë kanë marrë besimin për kandidimin e tyre për deputetë të Kuvendit të Republikës së Kosovës. Anëtarët Salihu dhe Softolli falënderuan të gjithë anëtarët e Asamblesë për bashkëpunimin e deritanishëm.
Më pas anëtari nga radhët e Lëvizjes Vetëvendosje, Ragip Fetahu, propozoi që në rend dite të shtohet pika “Parandalimi i fenomeneve negative tek të rinjtë dhe adoleshentët në Podujevë”.
Ndërsa, shefi i Grupit të LDK-së Valon Demolli, propozoi që në rend dite të shtohet edhe pika: “Propozim për zëvendësimin e një anëtari të Komitetit për Politikë dhe Financa pas dorëheqjes së anëtarit Qëndrim Softolli”.
Në këtë mbledhje u miratuan këto pika të rendit të ditës:
1. Procesverbalet nga mbledhjet e Kuvendit të Komunës të mbajtura më 12 shtator 2024, 26 shtator 2024 dhe 4 nëntor 2024.
2. Propozim-vendimi për subvencionimin e shpenzimeve për shërbimet e varrimit të qyetarëve me vendbanim të përhershëm në territorin e Komunës së Podujevës.
3. Draft-Plani i punës së Kuvendit të Komunës së Podujevës për vitin 2025.
4. Propozim-vendimi për miratimin e listës së veçantë të pronave të paluajtshme të Komunës që planifikohen për dhënie në shfrytëzim gjatë vitin 2025.
5. Informatë e punës së Drejtorisë së Shëndetësisë dhe Mirëqenies Sociale korrik-nëntor 2024.
6. Informatë e Drejtorisë së Bujqësisë, Pylltarisë dhe Zhvillimit Rural.
7. Propozim për zëvendësimin e një anëtari të Komitetit për Politikë dhe Financa pas dorëheqejes së anëtarit Qëndrim Softolli (u zëvendësua me anëtarini Ekrem Rrahmani).
Ndërsa pika “Parandalimi i fenomeneve negative tek të rinjtë dhe adoleshentët në Podujevë” e propozuar nga anëtari i LVV-së, Ragip Fetahu, pas një diskutimi është shtyrë për seancën e radhës me kërkesë të anëtarëve të Kuvendit me arsyetimin se nuk i kanë materialet e paraqitura nga propozuesi i pikës dhe se për të diskutuar për këtë temë duhet të jenë prezentë edhe akterë tjerë relevantë, përfshirë ata të sigurisë.
