Analiza e CNN: Kështu i rrëzuan Izraeli dhe aleatët mbi 300 raketa dhe dronë iranianë

Pothuajse të gjitha raketat balistike dhe dronët e lëshuar nga Irani në Izrael në një sulm të paprecedentë të shtunën vonë u kapën dhe nuk arritën ta mbërrinin cakun e tyre, sipas zyrtarëve izraelitë dhe amerikanë, të cilët theksuan mbrojtjen raketore të frikshme dhe ndihmën nga dy partnerët aleatë të Izraelit.

Shumica e më shumë se 300 municioneve iraniane u kapën përpara se të arrinin në Izrael, më shumë se 1,100 milje (1,770 kilometra) nga pikat e tyre të nisjes.

Marina amerikane dhe avionët luftarakë amerikanë rrëzuan disa raketa balistike, si dhe municione të tjera iraniane, i thanë zyrtarët gazetarit Oren Liebermann të CNN në Pentagon.

Sistemi Iron Dome i Izraelit, shtresa e poshtme e mbrojtjes raketore, përdor një sistem komandimi dhe kontrolli që llogarit shpejt nëse një predhë përbën kërcënim ose ka të ngjarë ta godasë një zonë të papopulluar. Nëse raketa përbën kërcënim, Iron Dome lëshon raketa nga toka për ta shkatërruar atë në ajër. Ka të paktën 10 bateri Iron Dome në Izrael.

Sisteme të tjera të mbrojtjes raketore izraelite përfshijnë David’s Sling, i cili përdor interceptorët ‘hit-to-kill’ të Stunner dhe SkyCeptor për të shënjestruar objektiva deri në 186 milje larg, dhe sistemet Arrow 2 dhe Arrow 3, të zhvilluara së bashku me Shtetet e Bashkuara, të cilat i kapin raketat balistike në hapësirë.

Izraeli ka gjithashtu avionë luftarakë të teknologjisë së fundit, duke përfshirë avionë stealth F-35I që i ka përdorur për t’i rrëzuar dronët dhe raketat e lundrimit më herët.

Presidenti i SHBA-së, Joe Biden tha në një deklaratë se ishin të përgatitur mirë për të ndihmuar në mbrojtjen e Izraelit kundër sulmit iranian.

“Për ta mbështetur mbrojtjen e Izraelit, ushtria amerikane zhvendosi avionë dhe shkatërrues të mbrojtjes raketore balistike në rajon gjatë javës së kaluar”, tha presidenti amerikan në një deklaratë.

“Falë këtyre dislokimeve dhe aftësive të jashtëzakonshme të pjesëtarëve tanë ushtarakë, ne e ndihmuam Izraelin t’i rrëzonte pothuajse të gjithë dronët dhe raketat”, tha Biden.

Britania tha se ishte gjithashtu e përgatitur të ndërhynte duke përdorur aeroplanët e Forcave Ajrore Mbretërore që i ka në rajon.

“Këta avionë të Mbretërisë së Bashkuar do të kapin çdo sulm ajror brenda rrezes së misioneve tona ekzistuese, siç kërkohet”, u tha në një deklaratë të Ministrisë britanike të Mbrojtjes.

Një zëdhënës i ushtrisë izraelite tha gjithashtu se Franca ishte e përfshirë në bllokimin e sulmeve iraniane.

“Ne po punojmë ngushtë me SHBA-në, Britaninë e Madhe dhe Francën që vepruan sonte. Ky partneritet ka qenë gjithmonë i ngushtë, por sonte u shfaq në një mënyrë të pazakontë”, tha zëdhënësi. /Express/