Hamza: E dinë qytetarët, kur them diçka, edhe e realizoj

Partia Demokratike e Kosovës e ka zyrtarizuar sot Bedri Hamzën si kandidat për kryeministër në zgjedhjet e ardhshme.

Në një konferencë për media, kryetari i kësaj partie, Memli Krasniqi, ka bërë publike kandidaturën e Hamzës.

Ky i fundit është ndier i vlerësuar me përgjegjësinë që ia ka dhënë partia.

“Ndihem tepër i vlerësuar me përkrahjen nga kryetari i PDK-së, z. Krasniqi, nga miku im shumëvjeçar, Memli, dhe nga strukturat e PDK-së. Por, përtej që ndihem i nderuar, e marr edhe si përgjegjësi”, ka thënë Hamza.

Në adresimin e tij të parë, ai ka bërë me dije se e ka të qartë se çka i duhet Kosovës.

“Kam një pasqyrë të qartë të të kaluarës, të tashmes dhe një vizion për të ardhmen e vendit tonë. Jam i vendosur të kontribuoi në avancimin dhe zhvillimin e Kosovës në të gjitha fushat. Besoj fort që kandidatura ime, me mbështetjen e plotë të kryetarit të PDK-së, z. Krasniqi, struktura e PDK-së do ta mirëpresin, sektori privat, bizneset private. Sepse biznesi privat është kontribuuesi më i madh në rritjen ekonomike të Kosovës, është punëdhënësi më i madh në Kosovës”, ka thënë Hamza.

Më tej, ai ka bërë me dije se Kosova ka nevojë për shumë reforma në fusha të ndryshme.

“Reformën e TVSH-së, bizneset këtë e kuptojnë dhe e dinë më se miri. Sigurisht se edhe të puenësurit në sektorin privat do të kenë mbështetjen tonë të plotë. Reforma në arsim, personeli arsimor do të jetë i respektuar, por do të jenë edhe të paguar. Do të kenë paga të dinjitetshme të cilat do të ju mundësojnë aty dhe familjareve të tyre një jetë korrekt”, është shprehur Hamza.

Kryetari i Mitrovicës ka bërë me dije qytetarët e dinë se kur të premton diçka e realizon atë.

“Sigurisht se e dinë të gjitha këto kategori që i përmenda, që kur e them diçka e realizoj. E kalkuloj mirë, e kalkulj saktë. Ndonjëherë doket si e madhe, por ajo ndodh. Ka ndodhur në të kaluarën dhe sigurisht se do të ndodh edhe në të ardhmen me mua kryeministër”, ka thënë Hamza.

Më tej, ai ka përmendur edhe sektorët tjerë që kanë nevojë për dorën e shtetit

“Shëndetësia përkrahja me furnizim me barna personel, shërbyes civil, ushtarë të ushtrisë, zjarrfikësit dhe të gjithë ata që fitojnë nga buxheti besoj fort se kandidaturën time do ta përkrahin. Sigurisht se e din të gjithë që këto kategori qe i përmenda i realizoj e kalkuloj saktë, nganjëherë duket e madhe por e realizoj”, ka thënë Hamza, duke mos harruar as sektorët tjerë.

“Institucionet do e kryejnë punën e tyre, sektori i sigurisë do të ketë përkrahjen dhe trajtim të veçantë deri këtu Kosova ka arrit me përkrahjen e ShBA-së dhe BE-së dhe shumë vende tjera mike nga e gjithë bota dhe ne do t’i thellojmë këto bashkëpunime në baza ditore. Kosovës i duhet paqja, stabilitetit dhe njerëzit në Kosovë do të jenë të punësuar, nuk do ta kenë opsion migrimin por jetesën në Kosovë. Programi do jetë i matshëm dhe konkret me një ekip profesional dhe punë ekipore që garanton sukses. Në këtë punë do përfaqësoj interesat e qytetarëve dhe mediat do jenë të respektuara e do ta kenë vendin e vetë. Do ia dalim synimit që e kemi”, është shprehur ai.

Krasniqi: Nga sot ndryshon loja

Edhe kryetari i PDK-së, Memli Krasniqi, është shprehur i emocionuar me zyrtarizimin e kandidaturës së Hamës për kryeministër.

Ai ka paralajmëruar partinë në pushtet se nga sot ka ndryshuar loja.

“Sot nuk ka njëri më adekuat për ta fituar betejën për mirëqenie në Kosovë. Unë jam me të dhe pas tij në çdo hap. Nga sot ndryshon loja në Kosovë. Frikë duhet të kenë ata në pushtet. Nëse dikush frikësohet duhet të frikësohet Albin Kurti. Ditët në pushtet i ka të numëruara.”, është shprehur Krasniqi.

Ai është shprehur i bindur se kandidatura e Hamzës do të përkrahet nga gjithë shoqëria.

“Unë jam i bindur se kandidimin e tij do ta mirëpresin të gjitha kategoritë shoqërore: mjekët dhe arsimtarët, policët dhe ushtarët, zyrtarët publik dhe fermerët, bizneset vendore dhe investitorët e huaj. Të gjithë pa dallim, sepse Bedriu do të punoj pa dallim. Unë jam i bindur se Bedri Hamza është njeriu i duhur për kohen në të cilën po kalojmë. Andja i kam kërkuar që të marrë këtë përgjegjësi për të kandiduar si kryeministër nga radhët e PDK-së”, ka thënë Krasniqi.