Vrasja në Prishtinë, Prokuroria jep detaje të reja: Të plagosur kanë mbetur edhe tre persona, një në gjendje më të rëndë

Prokuroria Themelore e Prishtinës ka dhënë detaje për rastin e mbrëmshëm në kryeqytet, ku një person mbeti i vdekur nga të shtënat me armë zjarri.

Mirëpo, sipas Prokurorisë, të plagosur kanë mbetur edhe tre persona, njëri prej tyre në gjendje më të rëndë shëndetësore.

Në vendin e ngjarjes janë sekuestruar gëzhoja, veturë e prova të tjera materiale. Të dyshuarit ende nuk janë kapur dhe po kryhen hetime në drejtim të identifikimit të tyre.

“Lidhur me rastin e vrasjes së rëndë, ju njoftojmë se prokurori kujdestar nga Departamenti i Krimeve të Rënda, ka dalë në vendin e ngjarjes dhe bashkë me njësitë relevante kanë ndërmarrë veprime hetimore në vendin e ngjarjes. Sipas hetimeve preliminare dyshohet se nga të shtënat me armë zjarri është vrarë një person, ndërsa tre persona të tjerë janë plagosur dhe kanë kërkuar ndihmë mjekësore, ku njëri prej tyre e ka gjendjen me të rëndë shëndetësore. Në vendin e ngjarjes janë sekuestruar gëzhoja, veturë e prova të tjera materiale të cilat do të shërbejnë në procedurën penale.

Me urdhër të prokurorit trupi i pajetë është dërguar në IML për obduksion, derisa në koordinim me policinë po zhvillohen hetime për arrestimin e të dyshuarve dhe sigurimit të prezencës së të njëjtëve në procedurën penale”, ka thënë për Reporteri.net zëdhënësja e Prokurorisë Themelore të Prishtinës, Laureta Ulaj.

Për rastin njoftoi mbrëmë edhe Policia e Kosovës.

Sipas policisë, ngjarja ka ndodhur rreth orës 21:15 në rrugën “Jeronim De Rada”, gjersa fillimisht u njoftua për një të plagosur.

“Rreth orës 21:15 është raportuar për gjuajtje me armë zjarri të ndodhur në rrugën “Jeronim De Rada” në Prishtinë. Me të marrë informatën, policia ka dalë në vendin e ngjarjes dhe nga informacionet e para është bërë e ditur se për pasojë dy persona kanë marrë plagë nga arma e zjarrit ku fatkeqësisht njëri nga ta ka ndërruar jetë”, tha  mbrëmë zëdhënësi i policisë, Agron Borovci.

Sipas raportimeve në media, e plagosura është një kalimtare e rastit, informacione këto që ende nuk janë konfirmuar zyrtarisht. /Reporteri.net/