Nga refuzimi për të dialoguar deri te pajtimi për propozime, dy ditë kohë për një zgjidhje për dinarin

Kosova dhe Serbia, deri më 22 mars, do t’i dorëzojnë propozimet e tyre për përdorimin e dinarit serb në Kosovë, ndërsa javën e ardhshme do të takohen sërish në Bruksel për diskutimin e opsioneve.

Të dy palët në takimin në nivel kryenegociatorësh që kishin dje, janë zotuar që, deri më 22 mars, t’i dorëzojnë propozimet e tyre për zgjidhjen e çështjes së përdorimit të dinarit serb në Kosovë, shkruan gazeta online Reporteri.net.

Kështu bëri të ditur në fund të takimit kryenegociatori i Kosovës, Besnik Bislimi, i cili e gjeti veten në Bruksel një muaj pasi kishte deklaruar se takimet e tilla për çështjen e dinarit nuk janë për kryenegociatorin, dhe se ai do të udhëtonte drejt Brukselit vetëm për të diskutuar për Marrëveshjen Bazike.

“U dakorduam që deri të premten secila palë të sjellë propozimin e saj se si e sheh zgjidhjen afatshkurtër dhe se si të fillohet zgjidhja afatgjate e dinarit. Dhe pastaj javën e ardhshme do të mblidhemi sërish të diskutojmë se a mund të gjejmë hapësire që këto dy propozime të bëhen një propozim”, ka thënë Bislimi.

Bislimi tha se Serbia ka refuzuar sërish Marrëveshjen Bazike dhe zbatimin e saj, teksa bëri të ditur se në takim janë diskutuar edhe disa nga shkeljet e marrëveshjes që i ka bërë Serbia.

“Sot në Bruksel në takimet e procesit të dialogut diskutuam lidhur me zbatimin e Marrëveshjes Bazike dhe Aneksit. Për fat të keq, Serbia përsëri refuzoi marrëveshjen dhe zbatimin e saj. Po ashtu, kemi prekur një sërë çështjet, ku janë trajtuar edhe disa shkelje të marrëveshjeve nga Serbia, si për energjinë, telekomunikacionin dhe pengimin e anëtarësimit të Kosovës në organizata ndërkombëtare”, shkroi Bislimi.

Edhe emisari special i Bashkimit Evropian për dialogun Kosovë-Serbi, Miroslav Lajçak, konfirmoi se me dy kryenegociatorët, Besnik Bislimin dhe Petar Petkoviqin, janë dakorduar që të hënën (më 25 mars) të takohen sërish në Bruksel.

“Prita dy kryenegociatorët për të diskutuar zbatimin e Marrëveshjes për rrugën drejt normalizimit dhe çështje të tjera, përfshirë ndikimin e vendimit në operacionet me para. Ne ramë dakord që të vazhdojmë me këtë çështje të hënën e ardhshme, ndërsa Marrëveshja do të duhet të adresohet nga liderët”, ka shkruar Lajçak, në platformën X.

Departamenti Amerikan i Shtetit mirëpriti  diskutimet në Bruksel nga kryenegociatorët e Kosovës dhe Serbisë për çështjen e rregullores së re të Bankës Qendrore të Kosovës. Mirëpo DASH-i ka bërë thirrje që diskutimet të vazhdojnë me urgjencë.

“Këto janë bisedime që i mirëpresim, që po mbahen sot në Bruksel brenda kornizës së dialogut të lehtësuar nga BE-ja, përfshirë diskutime për rregulloren e re të Bankës Qendrore të Kosovës. Besojmë se këto diskutime duhet të vazhdojnë me urgjencë. Dialogu i lehtësuar nga BE-ja është kanali adekuat për të zgjidhur këto çështje të ndërlidhura me normalizimin e marrëdhënieve mes Kosovës dhe Serbisë. Ne shprehëm shqetësimet tona lidhur me dinarin”, ka thënë zëvendës-zëdhënësi i DASH-it, Vedant Patel në konferencë për media.

Diplomatë perëndimorë i kërkuan Kosovës që ta pezullojë rregulloren, për t’iu dhënë kohë qytetarëve të prekur që të përshtaten me praktikën e re.

Ndërkaq, kryeministri i Kosovës, Albin Kurti tha dje se enuk ka propozim që Kosova i pranon e që janë në kundërshtim me rregulloren e BQK-së.

“Ata japin vazhdimisht propozime. Unë nuk është e thënë që propozimet e tyre t’i shpalos publikisht duke bërë zëdhënësin e ambasadave. Nuk e bëj dot këtë punë. Unë po tregoj që ne i kemi ofruar një letër Bankës Popullore të Serbisë nga ana e guvernatorit, që në këtë rast na përfaqëson të gjithëve si qytetarë të Republikës, juve si gazetarë, mua si kryeministër dhe ne presim përgjigje nga ana tjetër”

“Për opsionet që kanë dhënë amerikanët, gjermanët, e të tjerët, unë besoj që duhet të flasin ata vetë”, u shpreh Kurti në një intervistë për Radio Evropa e Lirë.