Ekrem Hyseni: Podujeva qeveriset nga një person që është bërë shembull i keqqeverisjes, keqmenaxhimit e korrupsionit

Kryetari I Lidhjes Demokratike të Kosovës dega në Podujevë, Ekrem Hyseni, në 34 vjetorin e themelimit të kësaj partia ka ngritur akuza ndaj kryetarit aktual të Podujevës, duke thënë se ky qytet po qeveriset nga një person që është bërë shembull i keqqeverisjes, keqmenaxhimit e korrupsionit, transmeton PodujevaPRESS.net

Hyseni ka thënë se “Sot Podujeva e Llapi po qeverisen nga një person pa integritet i cili ka shndërruar institucionin shtetëror në kompani private për punësim të familjarëve e bashkëpartiakëve, për financim të dostave dhe njerzve me dosje”.

Mbrëm LDK në Podujevë ka mabajtur një aktivitet partiak në përvjetorin e themelimit të kësaj partie në këtë qytet 34 vite më parë.

Ky është fjalimi i Ekrem Hysenit:

I nderuari kryetar i LDK-së, z. Lumir Abdixhiku,

Të nderuar anëtarë te LDK-së,

Të nderuar veprimtarë dhe simpatizantë të LDK-së,

Zonja dhe zotrinjë,

Të nderuar të pranishëm,

Mirë se erdhët në pritjen e organizuar me rastin e shënimit të 34 vjetorit të themelimit të Lidhjes Demokratike të Kosovës në Podujevë.

Lidhja Demokratike e Kosovës, po mbush sot 34 vjet të veprimit të saj në Podujevë. 34 vjet angazhim, 34 vjet përkushtim, 34 vjet përpjekje për t’ju dhënë udhën e duhur proceseve jetike për Republikën.

U themelua në kohë të vështira, rrodhi si përgjigja e vetme përballë gjithë atij presioni me të cilin përballeshin qytetarët e këtij vendi.

LDK është kundërshtarja e parë e sistemit socialist njëpartiak, dhe është shkëndija e parë e demokracisë dhe pluralizmit partiak në Kosovë e në ish Jugosllavi

Përjashtimet nga puna dhe nga jeta institucionale kishin për qëllim përuljen e popullit shqiptar në Kosovë e më pas një spastrim etnik. Këto u zhvilluan edhe më, me përjashtime të nxënësve e mësimdhënësve nga shkollat, me helmimin e tyre, të gjitha këto në kuadër të përpjekjeve për spastrim.

Por ne nuk u PËRKULËM. NUK u përkulëm sepse LIDHJA DEMOKRATIKE E KOSOVËS filloi rezistencën paqësore me një vetorganizim të pashoq.

Ishte periudhë, kur LDK u doli në ballë sfidave, duke u dalë në ndihmë qytetarëve.

Arritja e lirisë, ishte synim i përhershëm i LDK-së, dhe prijësit të saj e të Kosovës, Dr. Ibrahim Rugova. Ai, asnjëherë nuk hoqi dorë, e punoi fort për lirinë, pavarësinë dhe demokracinë e Kosovës.

Në këtë drejtim, falë punës, dijes, angazhimit dhe përkushtimit të tij, sot lirshëm mund të themi, por edhe me krenari se çdo proces për Kosovën shtet të pavarur e sovran, si para luftës edhe pas luftës, mbanë vulën e LDK-së.

Gjë për të cilën shprehi mirënjohjen dhe falënderimin tim për gjithsecilin që kontribuoi në LDK, dhe të cilët asnjëherë nuk kursyen veten. E FALËNDEROJ PËRZEMËRSISHT EDHE SECILIN PREJ JUVE KËTU, që vazhdoni ta bartni këtë barrë e trashëgimi.

Ashtu siç u angazhua për ruajtjen e mbijetesës në vitet ’90-ta, LDK nga viti 2000 e tutje, pas zgjedhjeve të lira, kur edhe mori besimin e qytetarëve të vet u vu në shërbim të ndërtimit dhe fuqizimit të institucioneve dhe vet shtetit.

Të nderuar të pranishëm,

Sot, kur reflektojmë për të djeshmen, duhet të mendojmë edhe për të nesërmen.

Një gjë ju them me bindje të plotë, se Republikës sot dhe qytetarëve të saj, i duhet LDK.

I duhet LDK-ja, sepse LDK nuk lejon të rrezikohet që të rrënohet ajo që u ndërtua me shumë mund, përpjekje e sakrificë.

I duhet LDK-ja, sepse është e vetmja garancë, që Republika është e sigurtë dhe në rrugën e drejtë.

I duhet LDK-ja, sepse veç LDK din dhe mund t’i ruaj miqësitë me vendet që na dolën krah n’kohërat më të vështira, sidomos miqësia speciale me Shtetet e Bashkuara të Amerikës.

Republikës sot i duhet LDK-ja, sepse asnjë proces historik për Republikën, nuk ka ndodhë, as nuk mund të ndodhë pa LDK-në.

Ashtu, siç Kosovës i duhet LDK-ja, LDK-ja i duhet po aq shumë edhe Llapit e llapjanëve.

Kjo gjë po dëshmohet çdo ditë e më tepër.

Secili qytetarë i komunës sonë e ka kuptuar në thelb se qeveriset nga një person që është bërë shembull i keqqeverisjes, keqmenaxhimit e korrupsionit.

Sot Podujeva e Llapi po qeverisen nga një person pa integritet i cili ka shndërruar institucionin shtetëror në kompani private për punësim të familjarëve e bashkëpartiakëve, për financim të dostave dhe njerzve me dosje.

LLAPI E LLAPJANËT NUK E MERITOJNË KËTË. ASNJË PREJ JUVE NË KËTË SALLË ASNJË PREJ FËMIJËVE TANË.

Llapi duhet t’i thotë një herë e përgjithmonë JO personave të tillë. Llapi duhet të mbyll dyert për persona të tillë!

Qytetarët e ndershëm e punëtorë të komunës sonë kanë nevojë për Rrugën e Re, kanë nevojë për LDK.

Prandaj, sikur dje, sot, nesër e përherë LDK-ja ka qenë, është dhe do mbetet shtëpia Juaja.

LDK-ja do jetë këtu përherë në shërbimin Tuaj!

Si kryetar i saj, ju garantoj se ashtu siç isha dje, jam edhe sot, e do jem edhe nesër në çdo shtëpi, në çdo lagje, në çdo fshat e pranë çdo njërit në mënyrë që bashkërisht t’i japim Llapit qeverisjen që e meriton.

Sot e përherë zyret e LDK-së janë e do jenë të hapura gjithnjë, për çdonjërin që ka vullnetin, gatishmërinë që të punojë për të mirën e komunës sonë, për të mirën e vendit tonë.

Në mënyrë që të bëjmë më të mirën për komunën tonë, të ORGANIZOHEMI e TE PUNOJMË që t’i japim fund kësaj keqqeverisje, këtij korrupsioni të madh që po e shkatrron të sotmen dhe të ardhmen e qytetarëve tanë.

LDK është e Llapit, e Llapi i përket veç LDK-së.

Urime 34 vjet LDK!

Zoti e bekoftë LDK-në!

Zoti e bekoftë Llapin, Repulbikën e Kosovës dhe qytetarët e saj!