RTK ia shkëput kontratën punëtorit të tyre që ia theu hundën kamerierit në bufe

Gazeta Sinjali raportoi mbrëmë për një përleshje që ndodhi në bufenë e RTK-së, që dyshohet se eskaloi pas një mosmarrëveshje momentale mes një punëtori të televizionit dhe një kamerieri. Rasti është konfirmuar edhe nga Policia tashmë, ndërkohë që është zbuluar se kush është i dyshuari.

Siç mëson Sinjali, i dyshuari që u përfshi në rrahje është Mirsad Bajraktari, punëtor i Teknikës, ndaj të cilit është urdhëruar masa e ndalimit policor.

Sipas informacioneve të para, rrahja ka qenë brutale dhe viktima ka pësuar frakturë në hundë.

Nga Policia e kanë konfirmuar incidentin për Sinjalin dhe kanë bërë me dije se i lënduari është dërguar për trajtim mjekësor.

“Sot rreth orës 19:30, kemi pranuar informatën për një rrahje në një bufe në rrugën Xhemajl Prishtina, ku kanë qenë të përfshirë dy persona. Lidhur me këtë rast në cilësinë e personit të dyshuar nga ana e policisë po intervistohet  një person, ndërkohë që personi i lënduar është dërguar për tretman mjekësor. Pas përfundimit të intervistimit me vendim të prokurorit të shtetit personi i dyshuar dërgohet në qendrën e mbajtjes për 48h”, thuhet në përgjigjen e Policisë për Sinjalin.

Drejtorin e përgjithshëm i RTK-së, Shkumbin Ahmetxhekaj, ka njoftuar se të njëjtiti i është shkëputur kontrata e punës.

“Kjo është sjellje e patolerueshme për RTK-në dhe ne kemi një rregullore të brendshme për përgjegjësi materiale dhe disiplinore, e cila në mënyrë decidive që përcakton se kur ka 3 apo 4 shkelje të cilat klasifikohen të tilla, kjo është shkelje e rendë dhe si e tillë ka masën më të rëndë disiplinore, pra shkëputjen e kontratës. Pra, ky është vendimi dhe kaq”, tha drejtori i RTK-së.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.