Hajnat s’kanë të ndalur, vjedhin katër kamera të sigurisë – ishin në pronësi të Policisë

Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet, fenomen ky mjaft shqetësues, që po shkakton humbje e pasiguri në biznese, e jo vetëm. Hajna herë të vetëm e herë në grup arrijnë të kryejnë vjedhje, madje edhe të rënda, raporton Gazeta Sinjali.

Cak i hajnave së fundi ishin edhe kamerat e sigurisë të vendosura në komunën e Kaçanikut, e të cilat ishin në pronësi të Policisë së Kosovës.

Burimet e Gazetës Sinjali kanë bërë me dije se persona ende të paidentifikuar kanë vjedhur katër kamera që ishin në lokacione të ndryshme të Kaçanikut.

Këtë e ka konfirmuar për Sinjalin edhe zëdhënësi i Policisë së Kosovës për Rajonin e Ferizajt, Kanun Veseli, i cili tha se kamerat në fjalë që një kohë të gjatë kanë qenë jashtë përdorimit.

“Më datën 16.01.2024 patrullat e policisë në Kaçanik, kanë vërejtur se në lokacione të ndryshme, brenda qytetit në Kaçanik mungojnë 4 kamera të sigurisë së qytetit, të cilat që një kohë të gjatë kanë qenë jashtë përdorimit.

Njësia e Hetimeve ka dalë në vendin e ngjarjes dhe nën autorizim të prokurorit kujdestar nga Prokuroria Themelore në Ferizaj i ka nisur hetimet për vjedhje”, tha Veseli.

Sinjali do të iu mbajë të informuar me detajet e reja lidhur me rastin.