Pastrimi i rrugëve nga bora në Podujevë mbetet në mëshirë të fatit, nuk ka kompani të kontraktuar nga komuna

“Mirëmbajtja verore dhe dimërore e rrugëve”, ishte aktiviteti i prokurimit me nr 615-23-4993-2-1-1 me vlerë totale 650,000.00 euro ka filluar me rastin e njoftimit për kontratë i cili është publikuar me rastin e hapjes së tenderëve të datës 13.10.2023, nga Komuna e Podujevës, transmeton PodujevaPRESS.net.

Me dt.16.11.2023 pas ankesës dhe kërksesës për ri-shqyrtim nga kompania EING COM Sh.P.K, departamenti i prokurimit merr vendim për pezullim të aktivitetit të prokurimit.

Mirëpo edhe pse fituese ishte kompania Grupi i OE “VIA EGNATIA SH.P.K.; NNSh VAAKAL; Natyra” me çmim € 330,268.29 por çuditërisht pas ankesës Autoriteti Kontraktues, pra Komuna e Podujevës e shpall fituese kompanin Grupi i Operatorëve Ekonomik EING COM SH.P.K.; EL-BAU SH.P.K me çmim më të lartë prej 237,223.83 €uro, apo në total 567,492.12 euro.

Kjo ka bërë që kompania fituese Grupi i OE “VIA EGNATIA SH.P.K.; NNSh VAAKAL; Natyra” të bëjë ankesë në Organin e Shqyrtues të Prokurimit dhe qe disa muaj nuk ka vendim përfundimtar nga ky organ çka ka bërë që Podujeva të mbetet në mëshirën e fatit pas reshjeve të borës dhe ngricave në rrugë.

Në ankesën që PodujevaPRESS e ka parë thuhet se “Aktivitet i prokurimit i titulluar “Mirëmbajtja verore dhe dimërore e rrugëve” dhe ka filluar me rastin e njoftimit për kontratë i cili është publikuar me datën 23.05.2023. Afati për dorëzimin e tenderëve ishte caktuar për datën 03.07.2023. Pas ankesave dhe disa ndryshimeve nga Autoriteti Kontraktues këtë rast Komuna e Podujevës, hapja e tillë publike ishte shtyrë për datën 13.10.2023 ku edhe është realizuar. AK fillimisht me datën 10.11.2023 na kishte shpallur si fitues të tenderit Grupi i OE “VIA EGNATIA SH.P.K.; NNSh VAAKAL; Natyra” por pas ankimit nga Grupi i Operatorëve Ekonomik (GOE) konkurrent, AK e kishte kthyer lëndën në rivlerësim. Pas rivlerësimit të tenderëve, me datë 29.11.2023 AK kishte publikuar Njoftimin e dytë mbi Vendimin e AK-së ku në bazë të së cilit ne jemi cilësuar tenderues i papërgjegjshëm. Të pakënaqur me këtë vendim, me datë 04.12.2023 kemi dorëzuar Kërkesë për Rishqyrtim pranë Autoritetit Kontraktues. Me datë 06.12.2023, AK e ka refuzuar Kërkesën për Rishqyrtim si të pabazuar andaj të pa kënaqur me refuzimin po i drejtohemi OSHP-së me këtë ankesë. Kriteri i vlerësimit është Tenderi i përgjegjshëm me çmim më të ulët. Kështu thuhet në ankesën e Grupi i OE “VIA EGNATIA SH.P.K.; NNSh VAAKAL; Natyra” bërë në Organin e Shqyrtues I Prokurimit.

Për këtë çështje ka reaguar edhe subjekti më i madh opozitar në Podujevë Lidhja Demokratike e Kosovës.

Kryetari i kësaj partie Ekrem Hyseni ka thënë se ”N’pikun e dimrit Shpejtim Bulliqi dhe qeverisja e tij e lë Llapin pa kompaninë e pastrimit të borës”.

N’pikun e dimrit Shpejtim Bulliqi dhe qeverisja e tij e lë Llapin pa kompaninë e pastrimit të bores, kështu ka thënë kryetari i LDK-së në Podujevë, Ekrem Hyseni përmes një statusi në Facebook, transmeton PodujevaPRESS.net.

Hyseni ka thënë se “Skandalet e qeverisjes lokale të Lëvizjes Vetëvendosje dhe të Shpejtim Bulliqit nuk kanë të ndalur.

Nga njëri skandal përfundojnë në tjetrin.

Se ata nuk kanë qëllim as synim lehtësimin dhe përmirësimin e jetës së qytetarëve të Podujevës, kjo gjë po dëshmohet çdo ditë e më tepër.

Asnjë ditë e vetme nuk mbetet pa një skandal.

E ku ka skandal më të madh të një qeverisjeje, kur pikërisht në pikun e dimrit i lë qytetarët pa kompaninë e pastrimit të borës.

Duke pasur për qëllim që ta  favorizojë kompaninë me çmim më të shtrenjtë, për qëllime të përfitimit personal, ka anashkaluar kompaninë më të lirë, e rrjedhimisht edhe i ka lënë sot rrugët në këtë gjendje të mjerë e të rrezikshme, e Podujevën e ka bërë si komunën e cila në mes të dimrit nuk ka një kompani për mirëmbajtjen e rrugëve.

Pra, për qëllime personale ka bërë që sot të rrezikohen qytetarët nga ngricat gjithandej Llapit, si në qytet ashtu edhe në fshatrat e komunës sonë.

Gjatë ditës së sotme është raportuar edhe për aksidentet e ndryshme, e të cilat po ndodhin pikërisht si pasojë e gjendjes së tmerrshme në të cilën ndodhen rrugët e Podujevës.

Kjo flet për përgjegjësinë tuaj, për papërgjegjshmërinë tuaj ndaj qytetarëve të Podujevës, ndaj detyrave, përgjegjësive dhe obligimeve.

Llapi dhe llapjanët nuk e meritojnë një qeverisje të tillë, as një kryetar të tillë!

Ju jeni turpi i Llapit!

Llapi  dhe llapjanët meritojnë më mirë!”, ka përfunduar Hyseni, i cili edhe ka publikuar foto të rrugëve me ngrica dhe të pa pastruara nga bora.