E rrah brutalisht gruan, 30-vjeçarja përfundon në spital – i dyshuari në paraburgim

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen raste ku viktima zakonisht janë gratë dhe vajzat që përjetojnë dhune psikike e fizike nga bashkëshortët e tyre dhe anëtarët tjerë të familjes, raporton Gazeta Sinjali.

Ndihmën e Policisë e ka kërkuar së fundi një grua nga fshati Druar i Vushtrrisë, pasi e njëjta është dhunuar fizikisht nga bashkëshorti i saj.

Burimet e Gazetës Sinjali brenda Prokurorisë kanë bërë me dije se pas një konflikti me bashkëshortin e saj, 30-vjeçarja është sulmuar fizikisht dhe si pasojë ka marrë lëndime trupore. Viktima ka kërkuar ndihmë mjekësore në spital, ndërkohë që i dyshuari është shoqëruar në stacion policor për intervistim.

Pas përfundimit të procedurave policore, Prokurori i Shtetit ka urdhëruar ndalimin e të dyshuarit, teksa brenda afatit ligjor ka parashtruar edhe kërkesë në Gjykatën kompetente për caktimin e masës së sigurisë.

Sinjali merr vesh se 32-vjeçari ka dalë para gjyqtarit të procedurës paraprake dhe të njëjtit i është caktuar masa e paraburgimit në kohëzgjatje prej 30 ditësh, nën dyshimet për kryerjen e veprës penale ‘Dhunë në familje’.