Kurti i ik emërtimit “Asociacion”, i referohet si “neni 7 i Marrëveshjes Bazë”

Kryeministri i Kosovës, Albin Kurti në fillim të mbledhjes së sotme të qeverisë ka folur edhe për takimet e zhvilluara dje në Bruksel për çka ka thënë se e kanë parë si mundësi të mirë për të kërkuar më shumë siguri për Kosovën, por edhe për të diskutuar rreth marrëveshjes.

Ai duke folur për çështjet atje, ka folur edhe për paketën “më të plotë” të pesë diplomatëve që vizituan Kosovën më 21 tetor, duke thënë se kjo përfshinte një zbatim gjithëpërfshirës të Marrëveshjes Bazë dhe Aneksit të Zbatimit.

Kurti e ka pranuar se ka një draft të Asociacionit të Komunave me Shumicë Serbe të propozuar nga pesëshja diplomatike për çfarë ka pritur të diskutohet e të dakordohet në Bruksel. Në këtë pikë, Kurti e ka evituar fjalën “Asociacion” ose “Vetëmenaxhim”, por iu është referuar si “neni 7” i marrëveshjes Bazë.

“Ftesa për këtë takim erdhi pas vizitës në Kosovë të pesë emisarëve të BE-së dhe SHBA-së më 21 tetor. Ne iu përgjigjëm pozitivisht sepse konsideruam si mundësi të mirë për të kërkuar nga krerët e BE-së më shumë siguri në kufirin e Kosovës me Serbinë që është 381 kilometra i gjatë, më i gjatë se kufiri me tri shtetet tjera marrë së bashku. Por, edhe për të diskutuar më tej mbi propozimin e tyre për një paketë më të plotë të zbatimit gjithëpërfshirës të Marrëveshjes Bazike, pjesës integrale që është Aneksi i Zbatimit dhe bashkërisht edhe me një draft të propozuar për zbatimin e nenit 7 të Marrëveshjes Bazike.”, tha Kurti.

Por, çfarë thotë neni 7?

“Të dyja palët janë të përkushtuara në arritjen e marrëveshjeve specifike dhe garancive, në përputhje me instrumentet përkatëse të Këshillit të Evropës dhe duke përdorur përvojat ekzistuese evropiane, për të siguruar një nivel të përshtatshëm të vetëmenaxhimit për komunitetin serb në Kosovë dhe mundësinë e ofrimit të shërbimeve në disa fusha specifike, përfshirë mundësinë e ndihmës financiare nga Serbia dhe kanalet e drejtpërdrejta të komunikimit të komunitetit serb me Qeverinë e Kosovës. Palët do ta zyrtarizojnë statusin e Kishës Ortodokse Serbe në Kosovë dhe do të ofrojnë një nivel të lartë të mbrojtjes së trashëgimisë fetare dhe kulturore serbe, në përputhje me modelet ekzistuese evropiane.”, thotë neni 7 i Marrëveshjes Bazë. /Paparaci.com/