Burri e rrah bashkëshorten, ajo e denoncon në Polici – zbulohet që posedon edhe armë

Mosmarrëveshjet mes çifteve shpeshherë eskalojnë në kërcënime e dhunë fizike. Zakonisht viktima janë gratë të cilat kërcënohen e dhunohen në forma të ndryshme nga partnerët e tyre e që më pas kërkojnë ndihmën e Policisë për të siguruar mbrojte, raporton Gazeta Sinjali.

Një rast i tillë ka ndodhur së fundmi në një familje në lagjen Emshir në Prishinë, ku Policia ka arrestuar një person – i cili dyshohet se ka ushtruar dhunë ndaj bashkëshortes.

Burimet e Gazetës Sinjali kanë bërë me dije se viktima ka rrëfyer në Polici se është rrahur nga burri, i cili i ka shkaktuar lëndime trupore, por edhe frikë e shqetësim.

Përballë kësaj situate, ajo vendosi ta raportojë atë që kishte ndodhur, me ç’rast zbuloi se bashkëshorti i saj posedon armë zjarri.

Si rezultat i denoncimit, i dyshuari është arrestuar dhe shoqëruar në stacion policor, ku gjatë kontrollit i është gjetur edhe revolja me disa fishekë.

Ndaj tij, pas përfundimit të procedurave policore, Prokurori i Shtetit, ka urdhëruar masën e ndalimit policor dhe inicimin e rastit për veprat ‘Dhunë në familje’ dhe ‘Mbajtje në pronësi, kontrollim ose posedim të paautorizuar të armës’.