I vodhën gjësende me vlerë dhe sistemin e kamerave të shtëpisë, një person kërkon ndihmën e Policisë

Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. Kështu e ka pësuar një familje në rrugën “Xhevat Qena” në Prishtinë, raporton Gazeta Sinjali.

Sinjali mëson se persona të panjohur kanë hyrë me forcë brenda shtëpisë së familjes Latifaj, ku kanë demoluar dhomat e gjumit dhe kanë arritur që të vjedhin gjësende të ndryshme me vlerë.

Bazuar në dëshminë e viktimës, i cili e ka denoncuar rastin në Polici, hajnat kanë vjedhur stoli të ndryshme dhe sistemin e kamerave të sigurisë, që në total dyshohet se kanë shkaktuar rreth 5 mijë euro dëm.

Njësitë policore kanë dalë në vendin e ngjarjes, ku kanë kryer ekzaminimet e nevojshme që ndihmojnë në zbardhjen e rrethanave të rastit dhe identifikimin e personave të dyshuar.

Me urdhër të prokurorit, rasti është iniciuar ‘Vjedhje e rëndë’, ndërsa veprimet tjera ligjore do merren posa të kapen të dyshuarit.