“Liberalizimi i vizave, çështje e hapur”, sqarohet zyra e Macron

Gjatë ditës u raportua se presidenti i Emmanuel Macron, kishte deklaruar se “Franca e ka pezulluar liberalizimin e vizave për Kosovë”. Kjo doli të jetë një gabim i përkthyeses së gjuhës frënge.

Abcnews.al ka siguruar një sqarim nga zyra e presidentit francez, lidhur me çështjen e liberalizimit të vizave për Kosovën.

Nga kjo zyrë kanë thënë se çështja e liberalizimit të vizave mbetet e hapur.

“Presidenti ka folur për tensionet mes Serbisë dhe Kosovës. Ai tha se cilat ishin kërkesat tona. Në këtë kontekst dhe duke marrë parasysh bllokadën e Prishtinës, presidenti vlerësoi se çështja e liberalizimit të vizave mbetet e hapur. Për më tepër, është një proces teknik dhe një diskutim që duhet bërë me partnerët tanë evropianë”, sqaroi zyra e Emmanuel Macron.