Vdes mamia llapjane Sanije Topanica, iu ndihmoi grave në lindje gjatë luftës
Zvarritet kërkesa e hebrenjve kosovarë për sinagogën
Hebrenjtë kosovarë në mungesë të një sinagoge në Prishtinë detyrohen të shkojnë në Shkup për t’i kryer ceremonitë fetare
Hebrenjtë kosovarë po detyrohen që të udhëtojnë deri në Shkup, ku gjendet sinagoga (tempulli i shenjtë) më e afërt me Kosovën, për të kryer lutjet e tyre.
Kërkesa e hebrenjve që jetojnë në Kosovë që të ndërtohet një sinagogë për të kryer lutjet si dhe shërbimet e tjera fetare edhe në kryeqytetin kosovar nuk po realizohet. Vitin e kaluar komuniteti hebre ka kërkuar nga Komuna e Prishtinës ndarjen e një lokacioni për ta ndërtuar sinagogën e tyre. Mirëpo, sipas përfaqësuesve të këtij komuniteti në Kosovë, nuk ka asnjë përgjigje nga autoritetet e komunës së Prishtinës në kërkesën që ata (hebrenjtë) kanë parashtruar. Aktualisht në Kosovë janë deklaruar se jetojnë rreth 75 hebrenj, me origjinë nga nëna apo babai.
Ruzhdi Shkodra, kryetar i Bashkësisë Hebreje-Bet Izrael Kosova, thotë për “Zërin” se institucionet e Kosovës, konkretisht komuna e Prishtinës ka premtuar ndarjen e një lokacioni për ndërtimin e sinagogës, por ai bën të ditur se pavarësisht interesimit se deri ku ka shkuar kërkesa e tyre, si komunitet nuk kanë marrë ende ndonjë përgjigje.
