Burri kthehet i dehur dhe e detyron gruan të largohet nga shtëpia, përfundon në ndalim policor

Numri i rasteve të dhunës në familje ka marrë përmasa shqetësuese në vendin tonë, pasi çdo ditë raportohen dhjetëra të tilla, ku zakonisht viktima janë gratë të cilat dhunohen në forma të ndryshme nga partnerët e tyre, raporton Gazeta Sinjali.

Një rast i tillë ka ndodhur dje në fshatin Maqitevë të Suharekës, ku është arrestuar një burrë, nën dyshimet për dhunë ndaj bashkëshortes së tij.

Sinjali mëson se rasti ka ndodhur në shtëpinë e tyre, ku i dyshuari, teksa ishte në gjendje të dehur e ka dëbuar nga shtëpia bashkëshorten dhe e ka kanosur.

Si pasojë e dhunës psikike që viktima ka përjetuar, ajo ka vendosur që të kërkojë ndihmë nga Policia, ku ka rrëfyer gjithë ngjarjen që kishte ndodhur në shtëpinë e tyre.

Si rezultat i denoncimit, i dyshuari, i cili është recidivist i dhunës në familje është arrestuar dhe shoqëruar në stacion policor për intervistim.

Pas përfundimit të procedurave policore, me urdhër të prokurorit i dyshuari është ndaluar për 48 orë dhe ndaj tij është iniciuar rasti “Dhunë në familje”.