Aksion i Policisë: Arrestohen dy dilerë të drogës, kapen rreth 30 qese me marihuanë

Abuzimi me substanca narkotike nga të rinjtë mbetet një shqetësim i madh në shoqërinë kosovare. Varësia nga droga sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues e shpërndarës të substancave narkotike. Një aksion i tillë është zhvilluar edhe gjatë ditës së sotme në Gjakovë, ku Policia ka arrestuar dy persona të dyshuar, raporton Gazeta Sinjali

Burimet brenda Prokurorisë kanë bërë me dije se Policia ka kryer edhe bastisje, teksa në rrugën “Beqir Kastrati” janë arrestuar dy dilerët që dyshohen për shitblerjen e drogës.

Sinjali mëson se gjatë këtij aksioni, janë kapur rreth 30 qese me substancë narkotike të llojit marihuanë, që u sekuestruan nga zyrtarët policorë.

Përveç marihuanës, gjatë kontrollit në banesën e të dyshuarve janë gjetur edhe një sasi e kanabisit, si dhe disa telefona, që po ashtu janë sekuestruar.

Pas përfundimit të proceduarve policore, të dyshuarit janë shoqëruar në stacion policor, ku kanë dhënë deklaratat e tyre lidhur me veprën me të cilën ngarkohen.

Ndaj tyre, Prokurori i Shtetit ka nxjerrë aktvendim për ndalim prej 48 orësh nën dyshimin se kanë kryer veprën penale “Blerja, posedimi, shpërndarja dhe shitja e paautorizuar e substancave narkotike, psikotrope ose analoge.”