Një muaj paraburgim për personin që dyshohet se theri me thikë kunatën e tij

Gazeta Sinjali raportoi për një rast të rëndë që ka ndodhur në familjen B. në fshatin Druarë të Vushtrrisë, ku djali I familjes, V, dyshohet se sulmoi me thikë kunatën e tij. I riu është arrestuar dhe ndaj tij Prokuroria ka parashtruar kërkesë për caktimin e masës së sigurisë.

Sinjali merr vesh se B. ka dalë para gjyqtarit të procedurës paraprake dhe atij i është shqiptuar masa e paraburgimit në kohëzgjatje prej 30 ditësh.

24-vjeçari do të hetohet nën dyshimet për kryerjen e veprës penale ‘Lëndim i lehtë trupor’.

Si ndodhi ngjarja?

E gjithë ngjarja dyshohet të ketë ndodhur në shtëpinë e palëve të përfshira, ku pas një konflikti verbal për përgatitjen e ushqimit, B. dyshohet se ka eskaluar në sulm fizik, duke e goditur 34-vjeçaren me thikë.

Viktima ka marrë lëndime trupore dhe është dërguar në spital, ku ka marrë ndihmën e nevojshme mjekësore.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.