Therje me thikë: Dy të rinj pësojnë lëndime, intervenon Policia

Mosmarrëveshjet për motive të ndryshme, e që shpeshherë dalin të jenë banale bëhen mollë sherri e kërcënimeve e përleshjeve mes të rinjve në vendin tonë. Për pasojë, konfliktet jo rrallëherë eskalojnë edhe në rrahje brutale, ku përdoren edhe mjetet e mprehta, raporton Gazeta Sinjali.

Një rast i tillë ka ndodhur edhe të shtunën në fshatin Brovinë të Gjakovës, ku dy persona janë therur me thikë dhe për pasojë kanë pësuar lëndime.

Kështu kanë bërë me dije burimet brenda Emergjencës, me ç’rast kanë njoftuar se gjendja shëndetësore e viktimave është stabile dhe të njëjtit janë jashtë rrezikut për jetë.

Posa rasti është denoncuar, njësitet policore kanë intervenuar në vendin e ngjarjes, ku janë kryer ekzaminimet e nevojshme dhe janë marrë informacionet e para lidhur me incidentin.

Pas përfundimit të procedurave policore, Prokurori i Shtetit ka urdhëruar që të iniciohet hetim për këtë rast dhe të zbardhen rrethanat dhe motivi i përleshjes.