Rumania e mposht Kosovën dhe ia shuan ëndrrën për kualifikim në Kampionat Evropian

Kombëtarja e Kosovës është mposhtur në udhëtim te Rumania, duke i humbur edhe ato shpresa të vogla për kualifikimin në Kampionat Evropian.

“Dardanët” pësuan humbje me rezultat 0:1, ku ishin me një lojtar më pak nga minuta e 42-të si pasojë e dy kartonëve të verdhë të Vedat Muriqit.

Ndeshja ishte shumë e baraspeshuar në fillim, por që u ndërpre për 45 minuta shkaku që huliganët rumun shpalosen një baner “Kosova është Serbi”.

Pas tërë kësaj ‘pauze’, policia largoi huliganët rumun duke vazhduar takimin sikurse s’ka ndodhur asgjë.

Sidoqoftë, problemet nisën kur sulmuesi Vedat Muriqi mori kartonin e dytë të verdhë pas një ndërhyrje, duke e lënë Kosovën me një lojtar më pak që nga minuta e 42-të.

Përzgjedhësi Primoz Ghila në pjesën e dytë mendoi vetëm për barazim, duke futur mbrojtës energjik dhe vendosur Mërgim Vojvodën në sulm, gjë që s’ishte parë me herët.

Aro Muric e shpëtoi Kosovën në minutën e 59-të duke mbrojtur penalltinë e Stanciu, që ishte shkaktuar nga Amir Rrahmani me një ndërhyrje te Coman.

Sidoqoftë, Kosova vazhdoi të mbrohej dhe golin e pranoi në minutën e 83-të, ku Stanciu shënoi pas një topi të kthyer (83’).

Me golin e pësuar, “Dardanët” u hodhën në sulm duke rrezikuar me Florian Loshaj, i cili u tregua paksa egoist dhe gjuajtur në qendër në vend se të tentonte ta gjente Albion Rrahmanin.

Fitoren e Rumanisë në minutat shtesë e vulosi i inkuadruari Valentin Mihaila (90+3’).

Me këtë fitore Rumania rimerr pozitën e dytë me 12 pikë, një më shumë se Izraeli dhe dy më pak se lideri Zvicra.

Ndërsa, sa i përket Kosovës – me këtu merr fund ëndrra për Kampionat Evropian duke qenë vetëm pozitë e pestë me katër pikë, me katër ndeshje të mbetura deri në fund.