“62 fishekë, një pushkë gjuetie e 2 antiplumba”, Policia tregon çka u gjet në shtëpinë e të dyshuarit të përfshirë në vrasjen në Podujevë

Një ngjarje e rëndë ka ndodhur ditën e djeshme në Podujevë ku një 30-vjeçar mbeti i vdekur dhe gruaja e tij e plagosur si pasojë e të shtënave me armë, shkruan Reporteri.net.

Në raportin 24 orësh të Policisë thuhet se është arrestuar një person i dyshuar si i përfshirë në kryerjen e veprës bashkë me të dyshuarin i cili është larguar nga vendi i ngjarjes.

“Një pistoletë me katër karikatorë dhe gjashtëdhjetë e dy (62) fishekë, një pushkë gjuetie me dylbi, njëzet fishekë (20), dy antiplumba dhe një veturë me targa të huaja”, thotë Policia se janë gjetur gjatë bastisjes në shtëpinë e të dyshuarit të përfshirë në vrasje.

Njoftimi i policisë:

VRASJE E RËNDË NË BASHKËKRYERJE

Podujevë 11.09.2023-12:20. Lidhur me rastin, pas pranimit të informatave për të shtëna me armë zjarri, njësitë policore dhe ekipi i emergjencës kanë vazhduar në lokacionin e cekur me ç’rast në vendngjarje është konstatuar se viktima mashkull kosovar ishte pa shenja jete, ndërsa viktimës femër pasi i është dhënë ndihma mjekësore është dërguar për hospitalizim në QKUK. Në lidhje me rastin është arrestuar një i dyshuar mashkull kosovar, nën dyshimin e bazuar se i njëjti është i përfshirë në kryerjen e veprës së lartcekur bashkë me të dyshuarin i cili dyshohet se kishte kryer vrasjen dhe ishte larguar nga vendi i ngjarjes. Po ashtu lidhur me rastin njësitë policore të shoqëruara nga prokurori kujdestar gjatë bastisjes në shtëpinë dhe objektet përcjellëse të personit të arrestuar kanë gjetur dhe konfiskuar: një pistoletë me katër karikatorë dhe gjashtëdhjetë e dy (62) fishekë, një pushkë gjuetie me dylbi, njëzet fishekë (20), dy antiplumba dhe një veturë me targa të huaja. Me aktvendim të prokurorit kujdestar, i arrestuari është dërguar në mbajtje, ndërsa i dyshuari tjetër ndodhet në arrati. Me urdhër të prokurorit kujdestar, trupi i pajetë është dërguar në IML për obduksion. Rasti nën procedurë hetimore.