Prokuroria: Pronarja e ordinancës në Malishevë ku vdiq pacientja, ishte rrobaqepëse

Gjykata Themelore e Gjakovës ka vendosur sot për një muaj paraburgim ndaj stomatologut Xh.K. dhe një muaj arrest shtëpiak ndaj motrës së tij H.K. për vdekjen e gruas nga Malisheva, e cila mori trajtim tek ata në ordinancën private.

Në kërkesën e Prokurorisë drejtuar Gjykatës janë dhënë detaje shtesë për rastin në fjalë për të cilin thuhet se ishte në pronësi të H.K. dhe funksiononte si qendër gjinekologjike, derisa e dyshuara nuk ka kualifikim mjekësor.

Sipas Prokurorisë, thuhet se ajo ka të kryer vetëm shkollimin fillor, ndërsa me profesion është rrobaqepëse.

“Ndërsa sipas kërkesës për të pandehurën H. K., “Me datën 22.08.2023, në Ordinancën “D.” në Malishevë, pa kualifikim mjekësor kryen trajtime mjekësore e cila është e regjistruar si Ambulancë Specialistike e Gjinekologjisë në emër të pandehurës, ndërsa e njëjta ka të kryer shkollimin fillor, me profesion rrobaqepëse, e ku në ordinancën e cekur më lartë, pas trajtimit mjekësor të dhënë nga vëllai i të pandehurës- i pandehurit Xh. K., ka ndërruar jetë tani e ndjera L. Sh”, thuhet në kërkesën e Prokurorisë drejtuar Gjykatës Themelore të Gjakovës.

“Po ashtu nga koha e pacaktuar e gjerë me datë 22.08.2023, me dashje dhe pa autorizim falsifikon dokumentin në emër të institucionit tjetër dhe atë të QKMF-së në Malishevë, në atë mënyrë që e njëjta si pronare e biznesit “D.”, me rastin e inspektimit në këtë ordinancë i janë gjetur 18 vërtetime për nxënës dhe studentë si dhe 16 udhëzime për konsultim të QKMF-së në Malishevë, të gjitha këto dokumente të zbrazëta mirëpo të vulosura me vulën e QKMF-së, pa autorizim nga institucioni përkatës”, u tha në njoftimin e Gjykatës Themelore të Gjakovës. /Klankosova.tv