Bie në pranga të Policisë i dyshuari që theri me thikë 47-vjeçarin, dërgohet në mbajtje

Pas dy ditësh në arrati, Policia ka arritur ta arrestojë personin që dyshohet për incidentin me thikë që ndodhi të dielën në Mitrovicë, ku një 47-vjeçar u plagos dhe pësoi lëndime të rënda. Për motive akoma të panjohura, viktima u sulmua në qendër të qytetit nga i dyshuari, i cili tashmë është kapur, raporton Gazeta Sinjali.

Kështu kanë bërë me dije burimet brenda Prokurorisë, me ç’rast njoftuan se i dyshuari është shoqëruar në stacion policor dhe pas intervistimit është dërguar në mbajtje.

Sipas informacioneve të para, i dyshuari e ka therur me thikë 47-vjeçarin, duke i shkaktuar plagë të rënda trupore. I njëjti është dërguar për trajtim mjekësor në Emergjencë pasi fillimisht i ishte dhënë ndihma e parë në vendin e ngjarjes.

Lajmin për Sinjalin e ka konfirmuar edhe zëdhënësi i Policisë për rajonin e Mitrovicës, Ilmi Prekazi.

“Sipas informatave të pranuara, në afërsi të postes kryesore në Mitrovicë një person ka mbetur i lënduar dyshohet me mjet të mprehtë-thikë, personi është dërguar për tretman mjekësor në emergjencë ndërsa njësitë kompetente janë duke u marrë me rastin”, tha ai.