Shtiu me armë në drejtim të një 20-vjeçari, ky është i arrestuari – Policia ia bastis shtëpinë

Para dy netësh, në Graçanicë pati të shtëna me armë si pasojë e një konflikti verbal mes dy personave, që për pak mund të përfundonte tragjikisht. Personi i dyshuar tashmë ka rënë në prangat e Policisë, ndërkohë që në shtëpinë e tij është kryer edhe bastisje me ç’rast janë gjetur armë e drogë, raporton Gazeta Sinjali.

Burimet brenda Prokurorisë kanë bërë me dije se personi që u denoncua për gjuajtje me armë në drejtim të një 20-vjeçari është B. I, i cili është arrestuar gjatë ditës së djeshme dhe është dërguar në mbajtje.

Sinjali mëson se rasti ka ndodhur të premten në mbrëmje, kur viktima kërkoi ndihmën e Policisë, pasi raportoi se është kërcënuar me armë zjarri nga i dyshuari, i cili sipas tij ka gjuajtur në drejtim të tij.

Si rezultat i denoncimit, Policia ka shoqëruar në stacion policor të dyshuarin, ndaj të cilit fillimisht është iniciuar rasti për veprën penale “Kanosje” e më pas është kryer bastisje në shtëpinë e tij.

Të njëjtat burime thonë se pas kontrollit policor, janë gjetur armë e municion, si dhe një sasi e substancave narkotike, që janë sekuestruar nga zyrtarët policorë në cilësi të provave materiale.

Pas përfundimit të procedurave, Prokurori i Shtetit ka urdhëruar inicimin e rasteve dhe ndalimin e të dyshuarit për 48 orë.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.