Grushtet në Kuvend, LDK del me qëndrim: Kërkon përgjegjësi politike për bisedën Kusari-Radojiçiq

Pas mbledhjes së Kryesisë, Lidhja Demokratike e Kosovës ka dal me një qëndrim për dhunën e përdorur në seancën e djeshme të Kuvendit, ku deputetë të PDK’së u përleshën fizikisht me Ministrat e Qeverisë Kurti, duke thënë se dënon pamjet e shëmtuara të dhunës dhe se e refuzon dhunën si mjet.

LDK ka kërkuar përgjegjësi politike lidhur me audio-incizimin ku Shefja e Grupit Parlamentar të VV’së, Mimoza Kusari-Lila dëgjohet duke biseduar me ish-deputetin e Listës Serbe, Sllavko Simiq, si dhe përmendet një bisedë e saj me Milan Radojiçiqin, i dyshuar për vrasjen e Oliver Ivanoviqit dhe i sanksionuar nga Shtetet e Bashkuara të Amerikës, shkruan Gazeta Online Reporteri.net.

“LDK vlerëson se vëmendja duhet të kthehet në normalizimin e situatës në veri dhe luftimin e krimit dhe korrupsionit. LDK kërkon përgjegjësi politike për skandalin e publikuar të përgjimeve ku pushteti dhe eksponentë të lartë të tij kanë komunikuar me kriminel që janë në listën e zezë të SHBA-ve dhe tendencat e tyre për ndërhyrje në procesin e drejtësisë si dhe përgjegjësi lidhur me arrestimet e njerëzve të pushtetit të dyshuar për korrupsion. Nga të gjitha skandalet e partisë në pushtet qytetarët janë harruar, prandaj është jetike që vëmendja e institucioneve të Kosovës të kthehet tek sfidat e tyre të përditshme”, thuhet në njoftimin e kësaj partie.

Në njoftim thuhet se  LDK do të vazhdojë konsultimet me grupe të ndryshme shoqërore.

“…në ndërtimin e masës kritike për ruajtjen e demokracisë, mendimin e lirë e orientimin euroatlantik, si projekt i pandryshueshëm i Republikës. Kosova duhet të kthehet në binarët e saj, prej ku pushteti populist e ka larguar duke e futur vendin në sanksione për tu zbrapsur pastaj në pikën që LDK ka insistuar në vazhdimësi”, përfundon njoftimi.