Auditori: Komuna e Podujevës ka bërë pagesë 250 mijë euro, pa faturë dhe pa raport të pranimit të punëve

Zyra e Auditorit të Përgjithshëm ka publikuar raportin për Komunën e Podujevës, njofton PodujevaPress.net
Sipas Auditorit, Komuna e Podujevës (Kryetari i Komunës) me datën 16.12.2021, kishte lidhë një marrëveshje bashkëinvestimi me Organizatën Joqeveritare Qatar Charity për ndërtimin e qendrës së urgjencës mjekësore në Podujevë në vlerë 1,200,000€, ku parashihej se Qatar Charity të participojë me 780,000€, ndërsa komuna me 420,000€. Nenin 3.6 i kësaj marrëveshje parasheh se palët nënshkruese pajtohen se do ta lidhin një marrëveshje tjetër pas sigurimit të mjeteve nga Qatar Charity në të cilën do t’i saktësojnë në mënyrë të detajuar obligimet e ndërsjella për realizimin e këtij projekti. Më tutje me 09.08.2022, ishte lidh një marrëveshje tjetër duke e plotësuar marrëveshjen e vitit 2021, në vlerë 1,700,000€, ku specifikohet se procedurat tenderuese do të bëhen me rregulla dhe politika të brendshme të Qatar Charity. Nga kjo vlerë komuna participon me 600,000€, ndërsa Qatar Charity me 1,100,000€. Me këtë marrëveshje parashihet që komuna këstin e parë të pagesës prej 250,000€, ta bëjë deri me 31.12.2022.

Por ajo që sipas Auditorit të Përgjithshëm që përbën keqpërdorim të financave thuhet se “Komuna me datën 29.11.2022, nga kodi ekonomik Objekte Shëndetësore kishte bërë pagesë në vlerë 250,000€, bazuar vetëm në marrëveshje bashkëinvestimi në llogarinë e Qatar Charity pa faturë dhe raport që tregon se punimet janë përfunduar. Për më tepër, e njëjta pagesë ishte regjistruar në SIMFK si pasuri në përdorim pa i plotësuar kushtet (faturën, situacionin për punët e kryera) që të regjistrohet si pasuri duke ndikuar kështu në mbivlerësimin e pasurive komunale.

Auditori thot se kjo ka ndodhur si rezultat i mos specifikimit të kushteve në marrëveshjen e lidhur për bashkëinvestim për mënyrën e pagesës së mjeteve ndaj donatorit, gjë që është si pasojë e mungesës së procedurave të qarta që e rregullojnë mënyrën e pagesave që kanë të bëjnë me marrëveshje të bashkinvestimit me donatorë të jashtëm.
Regjistrimi i pagesës pa i plotësuar kushtet për regjistrim si pasuri në përdorim ka ndodh si rezultat i pakujdesisë së zyrtarit të pasurisë për ta regjistruar pasurinë sipas kërkesave ligjore.

E sipas Auditorit diçka e till nuk është parandaluar nga kryetari i komunës së Podujevës, i cili është Zyrtari Kryesor Adminiatrativ.