Vihet gurthemeli për ndërtimin e Qendrës Multifunksionale në Podujevë

Me ceremoni solemne është vendosur gurthemeli për ndërtimin e Qendrës Multifunksionale në qytet, gurthemelin për ndërtimin e Qendrës e kanë bërë kryeministri i Republikës së Kosovës Albin Kurti, Kryetari i Komunës Shpejtim Bulliqi, Ministri për Kulturë, Rini dhe Sport Hajrulla Çeku, Drejtori për Kulturë, Rini dhe Sport Pajtim Balaj si dhe zyrtarë të tjerë, njofton zyra për informim e kësaj komne, transmeton PodujevaPRESS.net
Qendra Multifunksionale do të ketë hapësirën rreth 1450 metra katrorë, amfiteatrin e vogël me kapacitet deri në 100 persona, 6 salla për takime dhe trajnime të ndryshme, zyret e administratës, terasën verore për aktivitete kulturore dhe do të jetë vendtakim si qendër rinore për të rinjtë dhe komunitetin artistik në qytetin e Podujevës.
Ky projekt po realizohet në bashkëfinancim mes Komunës së Podujevës e cila participon me 100 mijë euro, si dhe Ministrisë për Kulturë, Rini dhe Sport që financon më 900 mijë euro.
Kryeministri Kurti tha “Jemi këtu që ta bëjmë vendosjen e gurthemelit për ndërtimin e një qendre për rininë, një qendër multifunksionale e cila do t’i ndihmojë të rinjtë që të kenë hapësira të përshtatshme për aktivitetet e tyre. Ne në përgjithësi kemi nisur një reformë për rininë në Kosovë, e cila shprehet jo vetëm në ligj të ri dhe strategji por gjithashtu edhe në këto infrastrukturat fizike”.
Kryetari Bulliqi tha “Kjo qendër ka një hapësirë prej 1450 metra katror dhe e cila tash e tutje do t’u shërbejë rinisë sonë, për arsye se aktivitetet e tilla i kanë shfrytëzuar në një hapësirë tjetër dhe me ndërtimin e këtij objekti do t’u krijohen kushte shumë më të mira. I falënderoj Qeverinë e Kosovës për investimin dhe mbështetjen në realizimin e këtij projekti”.