Tensionet në veri, Kurti takon Borrellin e Lajçakun në Bratislavë

Kryeministri i Kosovës, Albin Kurti, pritet të takohet sot me përfaqësuesin e Lartë të Bashkimit Evropian, Josep Borrell, dhe emisarin e BE-së, Miroslav Lajçak, në Bratislavë.

Takimin e ka konfirmuar për Gazetën Online Reporteri.net, zëdhënësi i Qeverisë, Përparim Kryeziu.

“Kryeministri Kurti po merr sot pjesë në ditën e fundit të Konferencës për Siguri Globale në Bratislavë. Ndër të tjerash, atje do të takojë Përfaqësuesin e Lartë të BE-së, Borrell dhe emisarin e BE-së, Lajcak si dhe do të jetë pjesë e disa paneleve të diskutimit”, tha Kryeziu për Reporteri.net.

Përveç takimit me zyrtarët e BE-së, Kurti do të marrë pjesë në disa panele të diskutimit.

“Qëndrimi i tij do të jetë njëditor. Brenda ditës do të jetë në Kosovë”, bënë të ditur nga Qeveria e Kosovës për Reporteri.net.

Ndërmjetësi evropian në dialog Lajçak, po gjatë ditës së sotme ka thënë se përshkallëzimi i fundit i situatës në veri, ishte i panevojshëm, derisa ka kërkuar nga palët të ulin tensionet.

“Më duhet të them se ky është një përshkallëzim absolutisht i panevojshëm dhe i palogjikshëm, sepse pas shumë e shumë muajsh negociata, arritëm dy marrëveshje të rëndësishme, në shkurt marrëveshjen për rrugën drejt normalizimit të marrëdhënieve ndërmjet Kosovës dhe Serbisë, dhe më pas në mars atë të Ohrit dhe aneksin e zbatimit. Kjo do të thotë se ne kemi një rrugë drejt normalizimit, kemi një program që trajton qartë të gjitha çështjet e hapura, kemi filluar ta zbatojmë atë dokument dhe pastaj ka ardhur kjo, e cila është krejtësisht e panevojshme, por fatkeqësisht shkakton shqetësime shumë të rënda”, ka thënë Lajçak ndër të tjera.

Shtensionim të menjëhershëm të tensioneve, ka kërkuar sot edhe sekretari amerikan i Shtetit, Antony Blinken, teksa ka dënuar sulmet e huliganëve serbë ndaj ushtarëve të KFOR-it gjatë tensioneve në veri.

Përmes një deklarate gjatë orëve të para të së mërkurës, sipas kohës lokale në Kosovë, Blinkeni ka bërë thirrje që Kosova e Serbia t’i përkushtohen dialogut.

Ndërsa ka theksuar se vendimi i Qeverisë së Kosovë që me forcë të hyjë në ndërtesat komunale ka përshkallëzuar tensionet në mënyrë të panevojshme.

Tutje ai ka pasur dy kërkesa ndaj Qeverisë e Kurtit, për të siguruar që kryetarët e zgjedhur të kryejnë detyrat e tyre kalimtare nga lokacione alternative jashtë ndërtesave komunale dhe të tërheqin forcat policore nga afërsia.