Paralajmëron Tahiri: Shkuam poshtë, rrezikojmë ikje masive të punëtorëve

Shefi i Grupit Parlamentar të AAK-së, Besnik Tahiri thotë se Kosova qëndron më se keqi në rajon në mesataren e pagave, ku sipas tij rrezikojmë të ketë ikje masive të punëtorëve për këtë arsye.

Teksa ka dhënë disa statistika për pagën mesatare në Kosovë, Tahiri thotë se Qeveria e Kosovës nuk ka ndërmarrë asnjë masë në lidhje me këtë.

Tahiri shton se duhet të shqyrtohet me urgjencë rritja e koeficientit në 129 euro.

Shkrimi i plotë:

Më së keqi në rajon në mesataren e pagave, rrezikojmë ikje masive të punëtorëve!

Rajoni, vendet e Ballkanit Perëndimor kanë nisur të marrin masa të shpejta, për t’u përballur me zhvillimet që po prodhohen nga ikja e punëtorëve.

Në Kuvendin e Republikës së Shqipërisë, po diskutohet për rritjen e pagës mesatare në 900 euro deri në prillin e vitit 2024.

· Lëvizje të ngjashme kanë marrë edhe vendet tjera të rajonit. Në krahasim me vitin 2015, kur Kosova kishte pagën mesatare 444 euro, Maqedonia e Veriut – 504 euro, Serbia – 537 euro, Mali i Zi – 726 euro dhe Shqipëria 259 euro

· Aktualisht, paga mesatare në rajon është: Kosova 504 euro, apo rritje prej 60 euro; Maqedonia e Veriut, 705 euro apo rritje prej 201 euro; Serbia – 763 euro, apo 226 euro, Mali i Zi – 792 euro apo 66 euro dhe Shqipëria – 900 euro, apo 641 euro.

Përderisa këta numra tregojnë për rritjen e pagës mesatare në rajon, Qeveria e Kosovës dhe Ministri Murati, përveç koeficientit të përcaktuar 105 euro, nuk ka ndërmarrë asnjë masë.

Me urgjencë duhet të shqyrtohet rritja e koeficientit në 129 euro në administratë publike siç kemi propozuar ne si AAK dhe të merren masa të shpejta për pagën minimale sipas amandamentit tonë që e kemi propozuar në Komisionin për Buxhet.

Në rast se ne presim, e që liberalizimi po ndodhë në një periudhë kur vendet evropiane, në veçanti Gjermania, ka rritur kontingjentin nga Ballkani Perëndimor, rrezikojmë që vitet pasuese të jenë goditje e rëndë për ekonominë tonë, në veçanti për punëtorët.

Veproni mos fleni se shkuam poshtë!