Komuna e Podujevës do t’i japë në shfrytëzim lokalet e Tregut të qytetit

Kuvendi Komunal i Podujevës e ka miratuar të martën propozim-vendimin për dhënie në shfrytëzim të përkohshëm të 12 lokaleve afariste që gjenden në Tregun e qytetit.

Sipas këtij dokumenti, lokalet që do të jepen në shfrytëzim janë ato me numër rendor 7, 8, 21, 22, 28, 36, 48, 50, 52, 53 dhe 54 të evidentuara në certifikatën pronësore 08-942-06-0029510/23 të datës 27.04.2023 njësia kadastrale parcela: P-71712062-00244-1, në sipërfaqe të tërësishme prej 11656 m². Qëllimi i dhënies në shfrytëzim i pronës së paluajtshme të Komunës të cekur në nenin 1 të këtij propozim-vendimi, sipas nenit 2, është shfrytëzimi për qëllime afariste, krijim i mundësive për vende të reja të punës dhe rritjen e të hyrave vetjake.

“Afati kohor për dhënien e pronës së paluajtshme të Komunës, të cekur në nenin 1 sipas këtij propozim-vendimi është afatshkurtër përkatësisht në periudhë 5 (pesë) vjet. Procedura për dhënien e pronës së paluajtshme të Komunës në shfrytëzim afatgjatë realizohet përmes ankandit publik të cilat zbatohen nga Komisioni përkatës vlerësues i cili ngrihet nga Kuvendi i Komunës”, thuhet në nenet 3 dhe 4 të këtij vendimi.

Siç theksohet në nenin pasues, të drejtat dhe përgjegjësitë e Komunës dhe të përfituesit të pronës së dhënë në shfrytëzim do të rregullohen me kontratë të veçantë, të nënshkruar nga kryetari i Komunës dhe përfituesi, pas përfundimit të procedurave përkatëse ligjore.

“Për zbatimin e këtij vendimi dhe procedurave përkatëse ligjore dhe nënligjore, kujdeset Komisioni vlerësues për zbatimin e procedurave për dhënien në shfrytëzim të pronës së paluajtshme të Komunës i cili formohet me vendim të veçantë nga Kuvendi i Komunës. Pas shqyrtimit dhe miratimit, si dhe përfundimit të procedurave të shqyrtimit administrativ të ligjshmërisë së këtij akti, i njëjti hyn në fuqi 7 ditë pas publikimit në uebfaqe zyrtare të Komunës”, thuhet në nenet 6 dhe 7.

Vendimi është miratuar me shumicë të votave. Krahas tij është miratuar edhe komisioni vlerësues për dhënie në shfrytëzim të këtyre lokaleve dhe komisioni për shqyrtimin e ankesave.