Podujeva bart 600 mijë euro të hyra nga viti i kaluar

Kuvendarët e Podujevës e kanë miratuar propozim-vendimin e ekzekutivit komunal për bartjen e 626 mijë e 613 euro të hyra vetjake që kanë mbetur të pashpenzuara në vitin 2022. Drejtori për Buxhet dhe Financa, Fatlum Osmani, ka thënë se nga kjo shumë e mbetur, 484 mijë e 537 euro janë tejkalim i arkëtimit të të hyrave.

“Këto mjete barten në administratën komunale, shëndetësi, arsim, si dhe në tri kategoritë ekonomike: në mallra dhe shërbime, subvencione dhe investime kapitale. Pjesa dërmuese e këtyre të hyrave barten në investime kapitale në vlerë 600 mijë e 180 euro. Vlera e tejkaluar e të hyrave prej 484 mijë euro e kemi të drejtën ligjore t’i bartim në projektet që nuk kanë qenë në implementim në vitin 2022 dhe këto mjete do të barten në ndërtimin e shkollës së mesme ‘Isa Boletini’ dhe në Stacionin e Autobusëve, secila nga 200 mijë euro”, ka thënë drejtori Osmani.

Ndërsa, këshilltari komunal nga radhët e LDK-së, Adnan Zymeri, ka pasur vërejtje për mostregimin nga secila drejtori për danimikën e kontratave për projektet e specifiuara në këtë propozim-vendim.

“Kuvendi duhet të di specifikisht ku do të shkojnë mbi 20 mijë euro për mallra dhe shëndetësi, njësoj si për mbi 5 mijë euro për shërbime dhe mallra në arsim. Në këtë propozim-vendim nuk e kemi pasqyrën e projekteve të papërfunduara. Në të njëjtën kohë kërkohet të ndahen mjete për projekte të reja”, ka thënë ai

Edhe bashkëpartiaku i tij, Qëndrim Softolli, duke folur për tejkaimi e të hyrave ka thënë se “ose me qëllim keni planifikuar më pak që tash të krenoheni që keni arrit me rritë realizimin e të hyrave, ose nuk keni ditur t’i planifikoni”.

Kuvedarët e LDK-së kanë kërkuar që 20 mijë euro të barten në kodin e Kuvendit Komunal në kategorinë e mallrave dhe shërbimeve, gjë që nuk është miratuar.

“Këtu kemi të bëjmë me bartje të të hyra vetanake nga viti 2022 në vitin 2023 që nuk janë të shpenzuara. Ne si Drejtori e Financave nuk kemi mjete për mallra dhe shërbime dhe ato janë në Drejtorinë e Administratës”, është përgjigjur Fatlum Osmani.

Kjo, sipas drejtorit për Buxhet dhe Financa, është arritur nga pagesa e qyetarëve dhe regjistrimi i shumë pronave të cilat nuk kanë qenë të regjistruara.

“Është e çuditshme se kanë qenë disa objekte shumë të mëdha në Komunën e Podujevës dhe biznese të mëdha që nuk kanë qenë të regjistruara, nuk janë parë për çudi”, ka theksuar ai.

Mbështetje, bartjes së të hyrave miratimit të tejkalimit të tyre i kanë dhënë këshilltarët e LVV-së dhe ata të PDK-së. Propozim-vendimi është miratuar me shumicë votash./KOHA net/N.Toverlani/