Incident me thika e me drunj në Podujevë: Sulmohet dhe pengohet Policia, shtatë zyrtarë përfundojnë në spital

Nuk janë të rralla rastet kur zyrtarët policorë ballafaqohen me kërcënime serioze nga qytetarë në qytete të ndryshme të Kosovës. Shpesh herë kërcënimet verbale eskalojnë edhe në sulme fizike ndaj tyre, duke ua vështirësuar punën e madje duke ua kërcënuar edhe jetën, raporton Gazeta Sinjali.

Një rast i tillë ka ndodhur mbrëmë në rrugën ‘Fitorja’ në Podujevë, ku Policia ishte vënë në ndjekje të një personi i cili ishte në kërkim policor.

Burimet e Gazetës Sinjali brenda Prokurorisë kanë bërë me dije se i dyshuari me të parë zyrtarët policorë ka filluar të ikte, por pavarësisht kësaj ai është arritur që të kapet dhe të prangoset.

Mirëpo drama e vërtetë kishte filluar me përfshirjen e familjarëve, të cilët kanë tentuar t’i pengojnë zyrtarët policorë që ta marrin të dyshuarin me veturën e Policisë. Ata dyshohet se u janë sulur policëve me drunj të gjatë, e madje vëllai i të dyshuarit ka kërcënuar me thikë një zyrtar policor.

Si pasojë e kësaj, shtatë zyrtarë policorë kanë marrë lëndime trupore dhe kanë kërkuar ndihmë mjekësore, teksa janë arrestuar tre vëllezërit e familjes Krasniqi.

Me urdhër të prokurorit, rasti është cilësuar ‘Sulm ndaj personit zyrtar’ dhe ‘Pengim i personit zyrtar gjatë kryerjes së detyrës zyrtare’.