Podujeva synon identifikimin e rreziqeve të korrupsionit me Plan të integritetit

Komunarët e Podujevës po synojnë t’i identifikojnë rreziqet e korrupsionit dhe eliminimin e tij nëpërmjet një Plani të integritetit, të cilin e ka vënë në diskutim publik. Këtë draft-plan 2023-2027, i cili është vënë diskutim publik, kryetari i Komunës, Shpejtim Bulliqi, e ka quajtur si dokument strategjik për fuqizimin e integritetit institucional.

“Grupi punues ka përgatitur planin për integritet 2023-2027, që paraqet një dokument strategjik që konsiderohet si një mjet parandalues për fuqizimin e integritetit institucional. Drafti është përgatitur me qëllim të përmirësimit të mëtejmë të kontrolleve ekzistuese, zhvillimit të tërësishëm të sistemit të menaxhimit të integritetit, përmbushjes së objektivave të integritetit dhe forcimin e zbatimit të legjislacionit dhe standardeve profesionale në kuadër të komunës”, ka theksuar Bulliqi.

Edhe këshilltari komunal nga radhët e Vetëvendosjes, Xhevdet Maloku, ka thënë se integriteti i institucioneve publike përbën një nga parimet kryesore të mirëqeverisjes dhe është një matës i funksionimit të demokracisë brenda institucionit.

“Integriteti është një nga faktorët kyç për ndërtimin e institucioneve transparente dhe llogaridhënëse ndaj publikut. Një plan i tillë i integritetit përfshin rreziqet e integritetit sipas fushave funksionale të komunës dhe aktivitetet konkrete për adresimin e tyre. Ky plan duhet të shihet si mbështetje për administratën për realizimin profesional të detyrave të punonjësve të administratës. Kësisoj ne si Grup i Lëvizjes e mbështesim këtë plan”, ka thënë Maloku.

Mbështetje i ka dhënë edhe Grupi i këshilltarëve të LDK-së. Në këtë draft thuhet se Plani për Integritet është një dokument strategjik, që konsiderohet si një mjet i rëndësishëm parandalues për fuqizimin e integritetit institucional.

“Ky plan kuptohet si një respektim i drejtpërdrejt i vlerave morale, standardeve profesionale dhe rregullave të zbatueshme normative. Gjithashtu, Plani është dokument operativ, që ofron masa të mbështetura tek risku për të arritur objektivat e integritetit të Komunës. Plani i integritetit mundëson: Identifikimin e rreziqeve përkatëse të korrupsionit në fusha të ndryshme të punës në një organizatë individuale”, ka theksuar dokumenti.

Tutje aty thuhet se mundëson vlerësimin e çfarëdolloj rreziku që mund të paraqesë rrezik për shfaqjen e korrupsionit për një organizatë individuale dhe përcaktimin e masave për të zvogëluar ose eliminuar rreziqet e korrupsionit.

“Plani i Integritetit do të kontribuojë në mënyrë domethënëse në: Rritjen e mundësive që Komuna të arrijë objektivat e saja organizative duke vënë përpara një menaxhim proaktiv të rrezikut të integritetit. Kjo do të përmirësojë rezistencën organizative ndaj korrupsionit dhe do të zvogëlojë mundësitë për korrupsion; Përqendrimin tek prioritetet, në bazë të identifikimit dhe vlerësimit të rrezikut që do ta ndihmojnë komunën të shpërndajë në mënyrë efektive burimet e disponoheshe kundër korrupsionit, që të shfrytëzohen në mënyrën më mirë të mundshme”, thuhet në këtë plan.

Gjithashtu ky dokument synon përmirësimin e kontrolleve operacionale ndaj shkeljeve të integritetit që do të rrisin efektivitetin, efikasitetin dhe transparencën e të gjitha proceseve, përfshirë ofrimin e shërbimeve.

“Mbajtjen e një sistemi për të siguruar pajtueshmërinë me kërkesat dhe standardet përkatëse ligjore dhe procedurale; Krijimin e një mjedisi të brendshëm të favorshëm kundër korrupsion përmes trajnimit të synuar dhe ndërgjegjësimit, si dhe duke inkurajuar një bashkëpronësi të të gjithë stafit në procesin e zhvillimit, zbatimit dhe monitorimit të planeve të integritetit; Rritjen e besimit të palëve të brendshme dhe të jashtme të interesit në përkushtimin për integritet që demonstrohet nga Komuna”, thuhet aty.

Plani flet edhe për parimet e menaxhimit të integritetit, lidershipin, përfshirjen e personelit, qasjen sistemore, objektivat e planit të integritetit (PI), procesin e zhvillimit të PI-së, monitorimin e zbatimit të PI-së dhe raportimin e fushat e rrezikut./KOHA net/N.T./