Për Tregun në Podujevë që nuk u funksionalizua asnjëherë u shpenzuan 50 mijë euro, tani i ndërrohet destinimi

Komuna ka hequr dorë nga funksionalizimi i tregut të gjelbër. Ky treg që është ndërtuar në vitin 2017 nuk kanë arritur ta funksionalizojnë dy qeveri lokale. Kuvendi Komunal ka marrë vendim që ta ridestinojë këtë hapësirë dhe aty tash pritet të zërë vend një qendër multifunksionale, ndërsa tregu do të zhvendoset në hapësirën ku tash është Stacioni i Autobusëve. Përfaqësues të shoqërisë civile konsiderojnë se kjo ka ndodhur për shkak të planifikimit jo të mirë

Funksionalizimi i tregut të gjelbër në Podujevë ka dështuar përfundimisht. Përpjekjet e dy qeverive komunale kanë rezultuar të pasuksesshme që nga viti 2017 kur ky projekt është përfunduar.

Ky investim që ka kushtuar rreth 50 mijë euro do të shkojë dëm, pasi Kuvendi Komunal ka marrë vendim për t’ia ndërruar destinimin kësaj hapësire, që tash më shumë shfrytëzohet si parking për vetura.

Tash aty pritet të zë vend një qendër multifunksionale.

“Hapësira e cila është destinuar për tregun e qytetit realisht ka qenë një hapësirë jashtë funksioni tash e sa vite dhe meqenëse nuk kemi arritur që tregtarët të cilët i shesin produktet e tyre, të shesin brenda hapësirave të tregut, jemi obliguar që atë hapësirë ta ridestinojmë për tjetër projekt”, ka thënë Fatri Zhitia, zëdhënës në Komunën e Podujevës.

Zhitia thekson se meqë qendra multifunksionale ka karakter tjetër, beson se kjo hapësirë do të jetë e përshtatshme për këtë projekt.

“Meqenëse qendra multifunksionale ka një karakter krejt tjetër, atëherë mendojmë se është hapësirë e përshtatshme dhe duke marrë parasysh edhe pronat të cilat janë të pakta komunale në qytet, të cilat mund të shfrytëzohen për projekte kapitale nga ana e komunës, duke i marrë për bazë të gjitha këto kemi vendosur që ajo hapësirë të destinohet për qendrën multifunksionale”, ka thënë ai.

Përfaqësues të shoqërisë civile thonë se projekti i tregut të gjelbër ka dështuar edhe për shkak të planifikimit jo të mirë dhe moskonsultimit paraprak me tregtarë dhe ekonomistë.

“Tregu i gjelbër në Komunën e Podujevës është ndërtuar në vitin 2017 dhe e dimë që tash gjashtë vite pasi është ndërtuar ai treg nuk është funksionalizuar as edhe një herë. Për rregullimin e asaj hapësire janë dhënë diku rreth 40 mijë euro të qytetarëve të Komunës së Podujevës. Andaj ne e konsiderojmë se kjo ka ardhur si pasojë e një moskonsultimi paraprak qoftë me ekspertët e ekonomisë, qoftë edhe me vetë tregtarët për vendin ku është ndërtuar”, ka theksuar Rexhep Zeka, drejtor ekzekutiv i OJQ “Sundimi i Demokracisë në Kosovë”.

Zeka e konsideron me vend vendimin për ndërtimin e qendrës multifunksionale.

“Për shkak që hapësira është më e madhe se lokacioni ku ishte paraparë më herët për qendrën multifunksionale, mendojmë se është vendi shumë më i duhur tani ku është vendosur. Është shumë e nevojshme që kjo qendër sa më shpejt të funksionalizohet për shkak se nuk ka pasur më herët qendër multifunksionale në Komunën e Podujevës, ku do të mund të kryenin shumë aktivitete edhe të rinjtë, edhe organizatat, por edhe të gjitha ata që kanë nevojë”, ka thënë Rexhep Zeka.

Ai shpreson se vendimi që tregut të zhvendoset në hapësirën ku tash është Stacioni i Autobusëve nuk është bërë pa biseduar me tregtarët paraprakisht.

“Ne mendojmë se të paktën kësaj here janë marrë të gjitha hapat e nevojshëm për konsultimin me tregtarë dhe nuk ka ndodhur e njëjta gjë, pra që t’u thuhet këtu e keni vendin dhe mund të shkoni t’i vendosni gjërat e juve në treg, sepse përndryshe, ne do t’ju gjobitim. Nëse kjo ka ndodhur atëherë kjo nuk është një zhvillim i ekonomisë të komunës tonë dhe natyrisht kjo nuk do të duhej të ndodhte”, ka thënë ai.

Zëdhënësi Zhitia thekson se gjatë bisedave me tregtarë, vendi ku tash është Stacioni i Autobusëve u është dukur i qëlluar.

“Meqenëse ajo hapësirë ku tash pritet të ndërtohet tregu i ri i qytetit po zhvillohet në vazhdimësi, mendojmë se do të jetë edhe hapësirë e përshtatshme për tregtarët e komunës sonë që të zhvillojnë veprimtarinë e tyre. I kemi pas disa takime të herë pas hershme me tregtarët të cilët u është dukur hapësirë më e përshtatshme ku e kemi menduar ne. Ndërsa, hapësira ku është tregu është konsideruar si e pa përshtatshme nga ana e tyre për zhvillimin e veprimtarisë”, ka thënë ai.

Tregu i gjelbër është ndërtuar në vitin 2017 dhe ka kushtuar rreth 50 mijë euro, 10 mijë prej të cilave i ka investuar Instituti RIINVEST.

Vitin e kaluar Komuna e Podujevës u kishte bërë thirrje tregtarëve që t’i shfrytëzojnë tezgat pa pagesë, por edhe kjo përpjekje ka dështuar. Tregu i gjelbër pritet të zhvendoset në vendin ku aktualisht është Stacioni i Autobusëve, por kjo nuk do të ndodhë deri sa të mos përfundojë ndërtimi i Stacionit të ri./KOHA net/N.Toverlani/