Këshilli i Bashkësisë Islame në Podujevë: Përkohësisht e kemi mbyllur xhaminë në Halabak

Këshilli i Bashkësisë Islame në Podujevë është i shqetësuar dhe e dënon incidentin e ndodhur mbrëmë afër xhamisë së fshatit Halabak, thuhet në njoftimin për media, transmeton PodujevaPRESS.net

Njoftojmë opinionin publik se ne më parë për atë xhami kishim lëshuar autorizim për kryerje të riteve fetare deri në një vendim i cili do të ishte unifikues për të gjithë banorët e atij fshati.

Tani, kur pakënaqësitë janë thelluar, ne, përkohësisht e kemi mbyllur xhaminë, deri në një vendim tjetër, thuhet ndër të tjera në komunikatë.

Komunikatë

Të nderuar!

Këshilli i Bashkësisë Islame në Podujevë është i shqetësuar dhe e dënon incidentin e ndodhur mbrëmë afër xhamisë së fshatit Halabak.

Njoftojmë opinionin publik se ne më parë për atë xhami kishim lëshuar autorizim për kryerje të riteve fetare deri në një vendim i cili do të ishte unifikues për të gjithë banorët e atij fshati.

Tani, kur pakënaqësitë janë thelluar, ne, përkohësisht e kemi mbyllur xhaminë, deri në një vendim tjetër.

Bashkësia Islame tërë angazhimin e saj po e bënë për të ruajtur qetësinë mes banorëve. Duhet ditur se xhamitë janë vend paqeje dhe i qetësisë shpirtërore, ndaj bëjmë thirrje për përmbajtje dhe mirëkuptim deri te një vendim sa më unifikues, thuhet në fund të komunikatës.

Edhe Policia e Kosovës ka dhënë detaje për përplasjen mes disa persona në fshatin Halabak të Podujevës.

Sipas raportit 24 orësh, deri të lëndimi i lehtë trupor erdhi pasi tre të dyshuar nuk kanë lejuar që hoxha i caktuar nga BIK-u të kryej ritet fetare në xhamin e fshatit.

“LËNDIM I LEHTË TRUPOR & ARMËMBAJTJE PA LEJE/Fsh. Halabak, Podujevë 18.02.2023 – 18:45. Raportohet se në momentin kur imami i caktuar nga Bashkësia Islame e Kosovës në Podujevë ka shkuar në xhaminë e fshatit për kryerjen e riteve fetare, katër persona nuk janë pajtuar me imamin e caktuar dhe e kanë penguar atë, pastaj tre të dyshuar që tani ndodhen në arrati, nuk kanë lejuar që të sulmohet hoxha dhe gjatë asaj kohe njëri nga të dyshuarit dyshohet se e ka sulmuar me kondak të revoles njërin nga katër viktimat duke i shkaktuar lëndime të lehta trupore. Viktimës i është ofruar tretman mjekësor”, thuhet në raportin e PK-së.

Sipas Policisë në koordinim me prokurorin e shtetit është kryer një kontroll në shtëpinë e të dyshuarve dhe është gjetur një fotroll e revoles.

Policia ka njoftuar më tej se të dyshuarit gjenden në arrati, rasti vazhdon të hetohet.