Xhelozia mollë sherri: Burri ushtron dhunë ndaj gruas, dyshon se ka hapur llogari në rrjete sociale

Numri i rasteve të dhunës në familje në vendin tonë ka marrë përmasa shqetësuese. Dyshimet për tradhti e xhelozia bëhen shpesh shkaktarë të dhunës fizike e psikike që përjetojnë gratë në Kosovë nga bashkëshortët e tyre. Për një rast të tillë, që ka ndodhur gjatë ditës së sotme në Mitrovicë, Policia ka nisur hetimet, raporton Gazeta Sinjali.

Sinjali mëson se rastin e ka konfirmuar gruaja, e cila ka kërkuar ndihmë nga Policia, pasi u përballë me dhunën e ushtruar nga bashkëshorti i saj, pas një mosmarrëveshje mes tyre.

Gjithë ngjarja dyshohet të ketë ndodhur për motive xhelozie, me ç’rast i dyshuari 37-vjeçar ka eskaluar, pasi po dyshonte se gruaja e tij kishte hapur rrjete sociale. Përballë kësaj situate, ajo ka vendosur të raportojë rastin në Polici, para se të ndodhë diçka më e keqe.

Si rezultat i denoncimit, i dyshuari është arrestuar dhe është shoqëruar në stacion policor për intervistim. Me urdhër të Prokurorit të Shtetit, i njëjti do të hetohet nën dyshimet për kryerjen e veprës penale ‘Dhunë në familje’.