Sonte nisin reshjet e shiut, IHMK paralajmëron vërshime

Instituti Hidrometeorologjik i Kosovës, ka njoftuar se nga sot pasdite dhe dy ditët e ardhshme do të ketë reshje të shiut me intensitet mesatarë deri në të lartë në tërë vendin.

Sipas IHMK- së  në disa zona në Kosovë mund të ketë vërshime të shpejta të lumenjve.

“Në Dukagjin (Gjakovë, Junik, Deçan, Pejë, Istog, Prizren, Klinë, Zubin Potok etj), mund të ketë vërshime të shpejta të lumenjve, fillimisht atyre të vegjël me karakter të rrëkeve të cilët zbresin prej viseve më të larta malore, duke pasur potencial për shembje apo rrëshqitje të dherave”, thuhet në njoftim.

Sipas IHMK-së në zonat urbane, në këto komuna, mund të shfaqen probleme me përmbytje të lokalizuara, në varësi të gjendjes së sistemeve drenuese, mirëmbajtjes dhe pastrimit të shtretërve të lumenjve dhe kanalizimeve.

“Kjo situatë pritet të ndikoj në ngritjen e niveleve dhe prurjeve të lumenjve kryesorë, veçanërisht të sistemit të lumit Drini i Bardhë, sidomos degët e tijë të djathta, Ibri etj”, njofton IHMK.