Ministria synon ndërtimin e rrugës Prishtinë-Podujevë më 2024, me buxhet është paraparë për tre vjet

Ministri i Mjedisit, Planifikimit Hapësinor dhe Infrastrukturës, Liburn Aliu, në takimin me qytetarë të Podujevës, ka theksuar se është kryer elaborati i shpronësimeve për këtë rrugë dhe kjo, sipas tij, mjafton që të fillojë faza e tenderimit. “Jemi shumë të vendosur që me përcjell realizimin e tij deri në fund. Në pranverë besojmë se do të fillojnë punët në 5 lote. Loti i 5-të është për pjesën ekzistuese që nuk është kryer. Na kërkojmë prej jush durim”, ka thënë Aliu gjatë prezantimit të projektit

Zgjerimi i rrugës magjistrale Podujevë-Prishtinë nuk pritet të përfundojë para vitit 2024. Madje, sipas zëvendësministrit të Mjedisit, Planifikimit Hapësinor dhe Infrastrukturë, Hysen Durmishi, buxheti është i paraparë për tre vjet, është bërë e ditur gjatë prezantimit të projektit në mbrëmjen e së enjtes në teatrin “Avdush Hasani”, në Podujevë.

Në këtë takim me qytetarë, ministri Liburn Aliu ka thënë se zgjerimi i rrugës Podujevë-Prishtinë është një nga projektet që më së shumti i ka nxjerrë telashe Ministrisë.

“Kemi menduar që pjesa e rrugës deri në Lluzhan do të përfundojë në vitin që shkoi, po e kemi parë se pa një lot të ri nuk mundemi ta përfundojmë. Është dashur edhe me i ba shpronësimet edhe me ba projektin. Nuk po dua ta fajësoj askënd. Neve na duhet të kemi kontroll të cilësisë. Shumë rrugë nuk janë ndërtuar si duhet. Jo për shkak se nuk kemi njerëz të duhur, por për shkak të sistemit të ndërtuar ndër vite”, ka thënë Liburn Aliu.

Ministri i Mjedisit, Planifikimit Hapësinor dhe Infrastrukturës ka theksuar se është kryer elaborati i shpronësimeve për këtë rrugë dhe kjo, sipas tij, mjafton që të fillojë faza e tenderimit.

“Jemi shumë të vendosur që me e përcjell realizimin e tij deri në fund. Në pranverë besojmë se do të fillojnë punët në të 5 lotet. Loti i 5-të është për pjesën ekzistuese që nuk është kryer. Na kërkojmë prej jush durim”.

E zëvendësi i tij, Hysen Durmishi, ka thënë se prioriteti kryesor i Qeverisë ishte rruga Prishtinë-Podujevë.

“E di që keni probleme, por e kemi pasur të pamundur të veprojmë më shpejt, sepse kemi trashëguar një gjendje shumë të rëndë. 12 rrugë kanë filluar para 10 vjetëve dhe për asnjë nuk është bërë as elaborati i shpronësimit e as shpronësimi dhe tash ne po duhet t’i paguajmë ato, bile me çmime shumë të arta. Ne kemi vendosur që nuk do të fillojmë asnjë rrugë pa u bërë shpronësimet dhe të kemi projektet sa më të mira”, është shprehur zv.ministri Durmishi.

Ai ka thënë se do të kujdesen që projekti të ketë edhe cilësi të lartë dhe se kjo rrugë do të ketë tri shtresa të asfaltit, përforcuar me fibra.

“38 milionë i kemi ndarë për ta përfunduar këtë rrugë. Do të bëjmë përpjekje maksimale që projektin ta përfundojmë brenda 2 vjetëve. Edhe pse struktura e buxhetit është e paraparë për 3 vjet”, u shpreh ai.

Qytetarët janë interesuar të dinë nëse do të ketë pengesa gjatë punimeve për ata që udhëtojnë, pastaj për peshën maksimale që do ta mbajnë urat e parapara, për numrin e nyjave, qasjen e banorëve në Gllamnik dhe sidomos te shkolla e këtij fshati. Ka pasur prej tyre që e kanë parë të panevojshme nyjën me dy nivele të rrugës në fshatin Shakovicë. Po ashtu, ka pasur interesim se si do të jetë i organizuar trotuari për këmbësorë në këto pjesë, pastaj për nivelin e shërbimeve që do të kenë këto nyja, nëse janë marrë parasysh “pikat e zeza” dhe aspekti social.

Durmishi ka thënë se në tender është paraparë çmimi më i favorshëm. Sipas tij, sapo të miratohet vendimi për shpronësim, do të fillojnë punimet në të gjitha lotet.

“Ne i kemi ndarë dy milionë euro për pjesën e rrugës që është punuar. Rruga me 4 korsi nuk do të jetë njësoj si tash me 2. Por nuk ka pika të zeza”, shtoi Durmishi.

Qytetarët kanë pyetur edhe për disa pengesa në fshatin Besi, ku po shkaktohen kolona të gjata për shkak të tyre. E zv.ministri Durmishi ka thënë se ato janë vendosur pas konsultimit edhe me policinë dhe me zyrtarë të tjerë. Sipas tij, një pjesë e tyre mund të hiqen, por kurrsesi të gjitha, për shkak të rrezikshmërisë për nxënësit që kanë shkollën afër.

Ministri Aliu ka thënë se për këtë rrugë do të ketë superekspertizë nga Universiteti i Prishtinës dhe, po ashtu, do të ketë kompani të kontraktuara për mbikëqyrje të projektit.

Kryetari i Komunës, Shpejtim Bulliqi, ka shprehur besimin se projekti do të realizohet pa ndonjë telash në terren.

Gjatë prezantimit të projektit nga kompania e cila e ka përgatitur atë është thënë se rruga do të ketë shiritin ndihmës në vendet ku ka hyrje-dalje nga rrugët dytësore, stacionet për autobus, nënkalime e mbikalime, të cilat në pjesën që është zgjeruar deri tash mungonin të gjitha./KOHA net/N.Toverlani/