Vodhi gjësende në vlerë të mbi 1 mijë eurove në një dyqan në Podujevë, 37-vjeçari bie në prangat e Policisë

Një fenomen mjaft shqetësues në Kosovë janë bërë vjedhjet e shpeshta nëpër banesa, shtëpi, institucione financiare, vetura e dyqane të qytetarëve, duke shkaktuar humbje e pasiguri, raporton Gazeta Sinjali.

Një ngjarje e tillë ka ndodhur mbrëmë në një dyqan që bën shitjen e gjërave të ardhura nga Gjermania, ku një person dyshohet se ka vjedhur gjësende të ndryshme.

Sinjali mëson se pronarja e lokalit ka denoncuar rastin në Polici, ku ka deklaruar se i janë shkaktuar dëme materiale më shumë se 1 mijë euro.

Personi që dyshohet se kreu veprën, është kapur nga kamerat e sigurisë që monitorojnë atë zonë dhe si rrjedhojë është bërë identifikimi i tij.

Njësitë policore me të dalë në vendin e ngjarjes kanë hasur në të dyshuarin, i cili me të parë Policinë ka tentuar që të shmanget, por kjo ka mbetur vetëm një tentativë e dështuar.

37-vjeçari është arrestuar dhe është shoqëruar në stacion policor, por që ka qenë i pamundur intervistimi i tij për shkak se ishte nën ndikim të alkoolit. Ndërsa gjësendet e vjedhura janë kthyer në pronësi të pronares së dyqanit.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor dhe ai do të hetohet nën dyshimet për kryerjen e veprës penale ‘Vjedhje e rëndë’.