Babai i foshnjës i kishte parë copat e trupit, rrëfimi për tmerrin që ndodhi në Spitalin e Pejës

Një rast i tmerrshëm ka ndodhur së fundmi në Spitalin e Pejës, ku një foshnje që ka lindur pa shenja jete dyshohet se është futur në rrobalarëse. Gruaja kishte lindur në javën e tetë për shkak të problemeve shëndetësore. Për rastin tashmë kanë nisur hetimet dhe kjo u konfirmua edhe nga Prokuroria.

Babai i foshnjës së vdekur në Spitalin e Pejës ka rrëfyer se si e kishte parë një punëtor të spitalit duke mbledhur copat e trupit të foshnjës së tij të vdekur.

Prindi ka deklaruar se pasi e kishin marrë lajmin për vdekjen e foshnjës kishin kërkuar nga stafi që t’ia dorëzonin trupin e pajetë. Ai thotë se stafi fillimisht kishin hezituar t’ua jepnin trupin e më pas i kishin thënë se do t’ua përgatisnin për ditën e nesërme.

“Foshnjën e kishin pështjell me çarçafë dhe e kishin vendos në një dhomë aty në spital. Kur shkuam nesër në mëngjes me marr foshnjën, ata i kishin kap çarçafët dhe nuk e kishin kuptu se foshnja është brenda dhe i kishin qu për pastrim në maqinë ku pastrohen çarçafët e spitalit”.

“Ne i shkuam prapa se e pamë që dikush po niset poshtë, më lindi pak dyshimi që o ka ndodh diçka. Pasi shkuam poshtë sigurimi e ka pa një person të spitalit aty duke i marrë copat e foshnjës dhe duke i shti në kese. Duke i mbledhë copë-copë. Mbetëm të shokuar, është rast që s’mujmë me paramendu qysh ka ndodh. Vazhduam prapë naltë, e lajmëruam policinë, erdhën policia në të njëjtën kohë motra kryesore insistojke na u lutke mos me thirr policinë, mos me bo këtë punë të madhe për arsye ndoshta ajo i din më mirë. Ne veç e lajmëruam rastin”, ka deklaruar prindi për indeksonline.

Ai ka thënë se nuk dinë më shumë detaje, përveç se foshnja ka vdekur dhe e kanë kryer procesin e varrimit. Ai dyshon se neglizhenca totale në këtë rast i përket repartit të gjinekologjisë në Spitalin e Pejës.

Për këtë rast Spitali i Pejës ka njoftuar se janë suspenduar 7 punonjës, ndërsa Policia e Kosovës ka njoftuar se janë duke u zhvilluar hetime.