Lajçak: “Marrëveshja e madhe” në fillim të pranverës, me dy seanca në Bruksel

Marrëveshja për normalizim të marrëdhënieve ndërmjet Kosovës dhe Serbisë mund të përmbyllet brenda javësh nëse palët janë të përkushtuara dhe serioze, ka deklaruar Përfaqësuesi Special i Bashkimit Evropian për dialogun Kosovë-Serbi, Mirosllav Lajçak.

Si afat për arritjen e marrëveshjes, ai e ka dhënë fillimin e pranverës dhe ka thënë se e gjithë kjo mund të bëhet me dy seanca, shkruan Gazeta Online Reporteri.net.

Tutje, Lajçak ka deklaruar se Bashkimi Evropian do të informojë shtetet anëtare për progresin në dialog, për secilën palë, veç e veç.

“Ne besojmë se nuk duhet të shpenzojmë shumë kohë për këtë propozim dhe për këtë marrëveshje. Nëse palët janë të përkushtuara, serioze dhe të gatshme kjo mund të përmbyllet brenda javësh. Dhe do të shohim shumë shpejt se sa të vendosura dhe të përkushtuara janë palët. Ajo që thuhet edhe në marrëveshjen që arritëm të mërkurën e kaluar është se BE-ja do të paraqesë rezultatet e këtij procesi për Kosovën dhe Serbinë. BE- ja do të informojë shtetet anëtare për progresin në dialog, veç e veç, për Kosovën dhe për Serbinë.

Dhe ne do t’i ftojmë ose do t’i mbledhim këto dy seanca në fillim të pranverës së vitit të ardhshëm. Pra, ky mund të jetë afati kohor që ju të kuptoni se si e parashikojmë këtë proces”, ka deklaruar Lajçak në një intervistë për Kanal 10.