“Çka po m’kqyrë bre”/ Plas sherri mes të rinjve, 19-vjeçari e kërcënon me armë një person

Jo rrallëherë motivet e konflikteve e të përleshjeve kanë ndodhur si pasojë e debateve verbale, që kanë eskaluar e shpesh kanë përfunduar edhe tragjikisht. Për një fjalë goje a një shikim shpesh kapen edhe të rinjtë kosovarë, të cilët i zë sherri me Policinë, raporton Gazeta Sinjali.

Kështu ka ndodhur edhe të shtunën pasdite, në rrugën “Bajram Curri” në Pejë, ku ka ndodhur një incident në mes të dy të rinjve, të moshës 19 dhe 24-vjeçare. Siç mëson Sinjali, i dyshuari A.M., e ka kanosur seriozisht viktimën M.M, të cilit ia ka zënë pritën dhe më pas ia ka drejtuar më pas armën.

Ngjarja dyshohet të ketë ndodhur në afërsi të një lokali, ku viktima 24-vjeçar kishte qenë te berberi, ku aty fillimisht kishte nisur konflikti. Sipas burimeve të Sinjalit nga Prokuroria, i dyshuari i kishte thënë viktimës “çka po m’kqyrë, nëse do njoftohemi” dhe më pas e kishte pritur jashtë.

Përballë kësaj situate, i riu që u kanos vendosi ta denoncojë rastin në Polici, ku dha versionin e tij për atë që kishte ndodhur. Si rezultat i denoncimit, Policia ka intervenuar në vendin e ngjarjes, ku është kapur personi i dyshuar, i cili më pas u shoqërua në stacion policor për intevristim.

Ndaj tij, Prokurori i Shtetit ka urdhëruar ndalimin prej 48 orësh dhe inicimin e rastit në drejtim të veprës penale “Kanosje” dhe dorëzimin e kallëzimit penal brenda afatit ligjor.